Ռումինիայի Կլուժ քաղաքում ընթացող մարմնամարզության Եվրոպայի առաջնությունում բավական հաջող են ելույթ ունենում Հայաստանի ներկայացուցիչները: Կան լուրջ նախադրյալներ, որ այս մրցաշարում կունենանք մեդալներ:
Բազմամարտում Արթուր Դավթյանը 82.132 միավոր արդյունքով զբաղեցրել է 8-րդ հորիզոնականը և դուրս եկել եզրափակիչ փուլ: Դավթյանը ելույթ կունենա նաև հենացատկի եզրափակչում: Այս վարժությունում մեր մարմնամարզիկը 14.383 միավորով զբաղեցրել է 6-րդ հորիզոնականը:
Առանձին գործիքների վրա հաջող են ելույթ ունեցել Արթուր Թովմասյանը, Վահագն Դավթյանն ու Հարություն Մերդինյանը: Թովմասյանն ու Վահագն Դավթյանը հանդես են եկել օղակների վրա: Թովմասյանը ստացավ 15.033 միավոր ու հաղթահարեց որակավորումը երկրորդ հորիզոնականով: Վահագն Դավթյանը 14.866 միավորով 4-րդն էր:
Նժույգների վրա վարժությունում Եվրոպայի գործող չեմպիոն Մերդինյանը 14.700 միավորով զբաղեցրեց 4-րդ տեղը: Այս վարժությունում հանդես եկավ նաև Արմեն Պետրոսյանը: Նա իր ելույթի համար ստացավ 13.633 միավոր, ինչը բավարար չէր եզրափակիչ դուրս գալու համար:
Բազմամարտի եզրափակիչը տեղի կունենա ապրիլի 21-ին, օղակների և նժույգի վրա վարժությունների եզրափակիչը՝ ապրիլի 22-ին, հենացատկի եզրափակիչը՝ ապրիլի 23-ին:
«Առաջին լրատվական»-ի հետ զրույցում Հայաստանի հավաքականի գլխավոր մարզչի օգնական Սոս Սարգսյանը նշեց, որ նվազագույն խնդիրն արդեն լուծված է, մրցավայր մեկնած 6 մարմնամարզիկներից 4-ը եզրափակչում են: «Մրցակցությունը բավական մեծ է: Բոլոր հավաքականները ներկայացել են ուժեղագույն կազմերով, սակայն ամեն ինչ անելու ենք բարձր արդյունքի հասնելու համար: Տղաները մարտական են տրամադրված, պատրաստ են եզրափակչին»,- ասաց Սարգսյանը:
Նշենք, որ այս մարզաձևը Հայաստանում վերջին տարիներին զգալի առաջընթաց է ապրել: Սուղ պայմաններում այսօր Հայաստանի չորս ներկայացուցիչները հեղինակավոր մրցաշարի եզրափակչում են և պայքար են մղում ամենաբարձր հորիզոնականների համար: Վստահաբար կարելի է ասել, որ մարմնամարզությունը դառնում է Հայաստանում հիմնական մարզաձևերից մեկը: Եթե ժամանակին միջազգային մրցումներում հիմնական հույսը կապում էինք ըմբիշների, ծանրորդների և բռնցքամարտիկների հետ, ապա այսօր համաշխարհային սպորտում մարմնամարզության պես դասական մարզաձևում ունենք լուրջ հաջողություններ:
Հատկապես ուրախալի է, որ շարունակ ի հայտ են գալիս երիտասարդ մարմնամարզիկներ, որոնց նկատմամբ ուշադրությունը կենտրոնացնելու դեպքում կարող ենք մտածել արդեն օլիմպիական մեդալների մասին: Մոտ մեկ ամիս առաջ Կատարի մայրաքաղաք Դոհայում կայացած մարմնամարզության աշխարհի գավաթի խաղարկությունում Արթուր Թովմասյանը օղակների վրա զբաղեցրեց առաջին հորիզոնականը: Նրա ելույթը տպավորել էր ոչ միայն երկրպագուներին, այլև մրցումներին հետևող մասնագետներին: Չենք սխալվի, եթե նշենք, որ Թովմասյանը 2020 թվականին կայանալիք օլիմպիական խաղերում կարող է դառնալ ոսկե մեդալի իրական հավակնորդ:
Աշխարհի գավաթի խաղարկությունում ոսկե մեդալ նվաճելը, ինչ խոսք, Հայաստանի համար մեծ հաջողություն է: Թովմասյանը փայլուն էր հանդես եկել նաև 2015 թվականին Հարավային Կորեայում տեղի ունեցած Համաշխարհային Ունիվերսիադայում: Այն ժամանակ օղակների վրա հավաքելով 15.000 միավոր՝ Թովմասյանը ոսկե մեդալ էր նվաճել:
Սպասելիքները մեծ են նաև Վահագն Դավթյանից և Արթուր Դավթյանից: Վերջինս պատանիների Եվրոպայի չեմպիոն է, մեկ ամիս առաջ աշխարհի գավաթի խաղարկության հենացատկում արծաթե մեդալի արժանացավ: Նժգույգի վրա վարժությունում էլ Դավթյանը զբաղեցրել էր երրորդ հորիզոնականը, ինչը ևս բարձր արդյունք կարելի է որակել:
Ինչ վերաբերում է Հարություն Մերդինյանին, ապա նա արդեն բազմիցս է ապացուցել, որ նժույգների վրա աշխարհի լավագույն մարմնամարզիկներից մեկն է և մեր հավաքականի առաջատարը: Անցյալ տարի Շվեյցարիայի մայրաքաղաք Բեռնում նա դարձավ չեմպիոն, և հուսանք, որ Կլուժում կպահպանի տիտղոսը:
