Հոլիվուդյան դերասան Սամյուել Լ.Ջեքսոնը հայտարարել է, որ հույս ունի, որ Օլիմպիական խաղերի վեցակի չեմպիոն Ուսեյն Բոլտը կմասնակցի Մեթյու Վոնի «The Secret Service» ֆիլմի նկարահանումներին, որը մեծ էկրաններ դուրս կգա 2014 թվականին:
Ֆիլմում, որը հիմնված է կոմիքսների վրա, բրիտանացի դերասաններ Քոլին Ֆերտն ու Մայքլ Քեյնը ստանձնելու են գաղտնի գործակալների դերեր: Նկարահանումներին կմասնակցի նաև Անգլիայի հավաքականի նախկին կիսապաշտպան Դևիդ Բեքհեմը:
Ջեքսոնը, ով մարմնավորելու է գլխավոր չարագործի կերպարը, վստահություն է հայտնել, որ հայտնի մարզիկների մասնակցությունը ֆիլմին կոմերցիոն մեծ հաջողություններ կբերի:
«Աշխարհը այնպես է փոխվել, որ երբեմն փառքը ավելի մեծ նշանակություն ունի, քան դերասանական հմտությունները:
Այդ իսկ պատճառով այս ֆիլմի համար յուրահատուկ առավելություն կլինի, եթե Դևիդ Բեքհեմը ու, հուսանք, Ուսեյն Բոլտը մասնակցեն նկարահանումներին», – Ջեքսոնի խոսքերն է մեջբերում The Gleaner-ը:
