«Քաղաքացիական պայմանագիր» կուսակցության առաջնորդ, «Ելք» դաշինքի անդամ Սասուն Միքայելյանի կարծիքով՝ նախընտրական քարոզարշավը դրական ազդեցություն ունեցավ «Ելք» դաշինքի համար, նա վստահ է, որ դաշինքը մեծ տոկոս է հավաքելու:
Ս. Միքայելյանն «Առաջին լրատվական»- ի հետ զրույցում անդրադարձավ Լ. Տեր-Պետրոսյանի հայտարարությանն այն մասին, որ Ղարաբաղի խնդրի լուծման հարցում իր տեսակետից տարբերվող տեսակետ միայն ՀՅԴ-ն է հայտնում: Նա նշեց, որ «Ելք» դաշինքի ծրագրում այդ մասին կետ կա, որ եթե Ադրբեջանը չճանաչի Ղարաբաղի անկախությունը, ոչ մի փոխզիջում: «Ես համոզված եմ, որ նման փոխզիջման գնալը ոչ թե անփություն է, այլ Ղարաբաղի կործանումն է: Դա փոխզիջում չէ, դա միակողմանի զիջում է. աշխարհում նման բան չի եղել, որ հաղթող կողմը ասի՝ եկեք այս տարածքները ձեզ եմ տալիս ոչ մի բանի դիմաց»,- նշեց ՔՊ առաջնորդը:
Անդրադառնալով հնարավոր հետընտրական զարգացումներին և համագործակցությանը, Ս. Միքայելյանը նշեց. «Սատանա կա Հայաստանում, դա ՀՀԿ-ն է, որը չարիք է իրոք, նրան պետք է քշել: Հանրապետականը հանրասեփական կուսակցություն է դարձել, սատանան պիտի դուրս գա հանրապետությունից:
Եթե հետընտրական իրավիճակ զարգանա, եթե գումարային առևտրից բացի՝ այս սատանաները փորձեն նորից ինչ-որ կեղծիքներ անել, բնական է, պետք է դուրս գանք փողոց և վերջ տանք սրան: ՀՀԿ-ն պետք է գիտակցի, որ այս ժողովրդին վերջը կտանի քաղաքացիական պատերզամի, որի նշույլներն արդեն երևում են: Ժամանակն է հասկանալ, որ էս ժողովուրդը ապրելու, արարելու իրավունք ունի էս երկրում»,- նշեց Ս. Միքայելյանը:
Մանրամասները՝ տեսանյութում:
