ԱՄՆ Նյու Յորք քաղաքում կազմակերպված «Հայաստան» ներդրումային համաժողովի շրջանակում թեմատիկ լիագումար նիստի մասնակից գործարարներին ներկայացվել են ֆինանսական ինստիտուտների կողմից մասնավոր ներդրումների աջակցման գործիքները: Հայաստանի զարգացման հիմնադրամի կողմից համաժողովը կազմակերպվել է՝ մեր երկրում օտարերկրյա ն երդրումները խթանելու նպատակով: Այս մասին տեղեկացրին Հայաստանի զարգացման հիմնադրամի լրատվական ծառայությունից:
Հայաստանի զարգացման հիմնադրամի գործադիր տնօրեն Կարեն Մկրտիչյանի կողմից նախապատրաստվել է ընդարձակ զեկույց, որն օտարերկրյա գործարարներին ներկայացրել է ներդրումային ու հետներդրումային շրջանում հասանելի աջակցության գործիքները:
«Հայաստանի զարգացման հիմնադրամը օտարերկրյա ներդրողներին տրամադրում է հարուստ գործիքակազմ, իրենց՝ Հայաստան մուտքը հեշտացնելու համար։ Հիմնադրամը նաև տրամադրում է տեղեկություններ շուկայի վերաբերյալ, աջակցում Հայաստան ճանաչողական այցերի կազմակերպմանը և, ընդհանուր առմամբ, գործարարներին քաջալերում ներդրումներ կատարելու Հայաստանում»,- նշված է հիմնական զեկույցում:
Լիագումար նիստի բանախոս, Վաշինգտոնում Եվրոպական ներդրումային բանկի մշտական ներկայացուցչի տեղակալ Կարլոտա Սենալմորը նշել է. «Մենք տեսնում ենք, որ Հայաստանը գնում է ճիշտ զարգացման ուղով և այդ ուղղությամբ մենք էապես մեծացնում ենք մեր ներգրավվածությունը Հայաստանում։
Համաժողովի մասնակից օտարերկրյա ներդրողներին տեղեկություններ են տրամադրվել նաև միջազգային ֆինանսական կառույցների կողմից տրված՝ երկրի վարկանիշի վերաբերյալ: Մասնավորապես, «Հերիթեյջ ֆաունդեյշընը», ներդրումների ազատության ինդեքսով, Հայաստանը վարկանշավորվել է 23-րդ տեղով, իսկ Համաշխարհային բանկի «Doing Business 2016» զեկույցը Հայաստանը դիրքավորել է 35-րդ տեղում՝ իր բարենպաստ գործարար պայմանների համար:
