Թուրքական Akşam թերթի փոխանցմամբ՝ Թուրքիան Սիրիայի հյուսիսում «Եփրատի վահան» գործողության շրջանակներում ԴԱԻՇ-ի թիրախներին հարվածել է սեփական արտադրության առաջին հարվածային անօդաչու թռչող սարքով (ԱԹՍ)՝ Bayraktar TB-2:
Պաշտպանական աղբյուրները հայտնել են, որ Bayraktar TB-2-ներն ակտիվորեն ներգրավված են թուրքական ռազմական գործողությունում, և որ դրանք մի քանի անգամ թռիչքներ են գործել և հարվածներ են հասցրել ահաբեկիչների թիրախներին:
Ընդգծվում է, որ Թուրքիան գործառնական պատճառներով նախընտրում է «Եփրատի վահան» գործողության ժամանակ չօգտագործել F-16 կործանիչներ: Bayraktar TB-2-ի առաջին փորձարկումն անցկացվել է ապրիլին: Ծրագրված է, որ այն Թուրքիայի զինված ուժերի զինանոցը կհամալրի մեկ ամսվա ընթացքում:
