Ինչպես հայտնի է, օգոստոսի սկզբին ԼՂՀ կառավարությունը հանդես եկավ հասարակական-քաղաքական մի խումբ գործիչների Արցախ հրավիրելու նախաձեռնությամբ՝ ծանոթացնելու համար, թե ապրիլյան պատերազմից հետո հավաքված գումարները ինչ արդյունավետությամբ են ծախսվել:
Արցախ էր մեկնել նաև ԱԺ պատգամավոր Թևան Պողոսյանը, որի խոսքով՝ քառօրյա պատերազմից հետո երևան եկած բացերը այս ընթացքում մեծապես լրացվել են:
«Այո՛, սահմանները ամրապնդվում են, առաջնագծում իրականացվում են ինժեներական, տեխնիկական աշխատանքներ, որպեսզի նմանատիպ անակնկալների խնդիրներ չունենանք»,- «Առաջին լրատվական»-ի հետ զրույցում նշեց պատգամավորը՝ ընդգծելով, որ, այնուամենայնիվ, կատարված աշխատանքներով չպետք է բավարարվել, այդ աշխատանքները պետք է կրեն շարունակական բնույթ:
Նրա խոսքով՝ աշխատանքներ են կատարվել նաև բանակի, հրամկազմի ուղղությամբ, նույնիսկ զարկ է տրվում գիտությանը:
«Ապրիլյան գործողությունները բացահայտեցին շատուշատ համակարգային խնդիրներ: Կային բացեր, որոնց պատճառով ունեցանք կորուստներ,- ասաց մեր զրուցակիցը՝ նշելով, որ այդ խնդիրները ոչ թե ողջ երկայնքով էին, այլ առանձին տեղերում:
Այնուամենայնիվ, մեր զրուցակիցը կարծում է, որ թերացումների համար մեղավորները պետք է պատասխանատվություն կրեն:
Թևան Պողոսյանը կիսում է մեր այն դիտարկումը, որ ՀՀ իշխանությունների նկատմամբ վստահության դեպքում 10 մլն սփյուռքահայ ունենալու պայմաններում շատ ավելի մեծ գումար կհավաքվեր այս նպատակների համար. «Այսպես թե այնպես՝ անվտանգության խնդիրը հանված չէ, այն գոյություն ունի, և մեկ ուրիշը չի լուծելու մեր խնդիրը: Արցախցիներին այլևս չեն մտահոգում սոցիալական խնդիրները, նրանց համար առաջնայինը անվտանգությունն է»:
Ինչպես նկատեց Թևան Պողոսյանը՝ Արցախի իշխանությունները կարծես մնացել են միայնակ. «Արցախի ողջ կարողությունը՝ քաղաքացիական և ռազմական, օգտագործվում է առաջնագծի ամրապնդման համար, ինչը նշանակում է, որ Արցախի տնտեսությունը մի քանի ամսով հետ է ընկնելու իր բնականոն կյանքից: Մենք իրավունք չունենք դա թույլ տալու»:
Արցախի հարցը կլուծվի այն ժամանակ, երբ Արցախը դառնա բանակցությունների կողմ, իսկ արցախցին առայժմ զբաղված է իր սահմանների ամրապնդմամբ՝ վստահեցնում է ԱԺ պատգամավորը:
