ՀՀ դատախազության պատվիրակությունը Մոսկվա կատարած աշխատանքային այցի շրջանակներում այցելել է ՌԴ դատախազության ակադեմիա:
ՀՀ Գլխավոր դատախազության լրատվական ծառայությունից տեղեկանում ենք, որ ՌԴ դատախազության ակադեմիայում տեղի ունեցած հանդիպման ընթացքում քննարկվել են ակադեմիայի և ՀՀ դատախազության միջև իրականացվող ծրագրերի վերաբերյալ հարցեր, հստակեցվել են համագործակցության ուղղություններն ու ձևաչափը:
Վերահաստատվել է ՀՀ դատախազների` ՌԴ դատախազության ակադեմիայում վերապատրաստվելու պայմանավորվածությունը:
Երկուստեք ընդգծվել է ինչպես փորձի փոխանակման անհրաժեշտությամբ պայմանավորված հանդիպումներ կազմակերպելու, այնպես էլ մասնագիտական նյութերի, ուսումնասիրությունների, զեկույցների փոխանակման կարևորությունը:
Կողմերը վստահություն են հայտնել, որ նմանատիպ հանդիպումները և համատեղ աշխատանքները կամրապնդեն փոխըմբռնումը և կնպաստեն առավել արդյունավետ համագործակցության զարգացմանը:
Քննարկվել են փոխադարձ հետաքրքրություն ներկայացնող հարցերի լայն շրջանակ:
