Ադրբեջանական APA լրատվական գործակալության փոխանցմամբ՝ Ադրբեջանի նախագահ Իլհամ Ալիևը հունիսի 7-ին ելույթ ունենալով Բեռլինում կազմակերպված Ադրբեջանա-գերմանական տնտեսական ֆորումում՝ հայտարարել է, որ Ադրբեջանը կդառնա տարածաշրջանի աշխարհագրական ու լոգիստիկ կենտրոն:
«Օգտվելով մեր աշխարհագրական դիրքից՝ մենք ստեղծել ենք տրանսպորտային ու լոգիստիկ հզոր ենթակառուցվածք, որը միմյանց է կապում աշխարհամասերը: Դրա օրինակներից է Մետաքսե ճանապարհի վերականգնման հետ կապված նախագիծը, որի մեկնարկը տրվեց 2007 թվականին, երբ մենք Թուրքիայի ու Վրաստանի հետ համատեղ ձեռնամուխ եղանք երեք երկրների միջև երկաթուղու կառուցմանը, որը միմյանց կկապի Ասիան ու Եվրոպան:
Այսպիսով՝ կարելի է ասել, որ ներկայումս տվյալ նախագիծը պատրաստ է, և ես հուսով եմ, որ այդ երթուղին կբացվի մինչև տարեվերջ: Չինաստանից Եվրոպա Ադրբեջանի տարածքով արդեն իսկ անցել են փորձնական առաջին բեռնատար գնացքները: Դա կլինի Ասիայից Եվրոպա ու հակառակ ուղղությամբ ամենակարճ ուղին: Հուսով եմ, որ գերմանական ընկերությունները կօգտվեն այդ հնարավորությունից, ինչը կիրագործվի մինչև ընթացիկ տարվա վերջ:
Միևնույն ժամանակ Բաքվից ոչ հեռու կառուցվում է Կասպից ծովում խոշորագույն ծովային նավահանգիստը, որի նախագծի, ինչպես նաև Ադրբեջանի տարածքն օգտագործելով՝ «Հյուսիս-Հարավ» միջանցքի նախագծի իրագործմամբ մեր երկիրը տրանսպորտային առումով կդառնա տարածաշրջանի աշխարհագրական ու լոգիստիկ կենտրոն»,- հայտարարել է Ալիևը:
