Հայաստանում տեղական ինքնակառավարումը շարունակում է մնալ կախյալ և չկայացած ինստիտուտ: Այսօր տեղի ունեցած մամուլի ասուլիսում նման տեսակետ հայտնեց Երևանի ավագանու անդամ, «Բարև Երևան» դաշինքի ներկայացուցիչ Ստյոպա Սաֆարյանը:
«Աննորմալ երևույթ է այն, որ Երևանի ավագանին 3 ամսով ամառային արձակուրդի է մեկնում: Մի մարմին, որը կոչված է լուծելու հասարակության ամենօրյա, կենցաղային խնդիրները, չի կարող նման աշխատաոճ ունենալ: Ամեն ինչ այնպես է արվել, որ Երևանի ավագանին դառնա մեկ անձի թատրոն, այս դեպքում՝ Տարոն Մարգարյանինը: Քաղաքապետարանում այնքան անսովոր են այլակարծության, որ ասում են ամեն տեղ ամեն բան չեն խոսի: Այսպիսի քաղքենիական մղումներով են առաջնորդվում այնտեղ»,- ասաց Ստյոպա Սաֆարյանը՝ հիշեցնելով, որ մի քվեարկության ժամանակ Տարոն Մարգարյանը չի իմացել, որ ինքը ևս ավագանու անդամ է և պարտավոր է մասնակցել քվեարկությանը:
Անդրադառնալով Երևանի կանաչապատ տարածքներն ավելացնելու վերաբերյալ Տարոն Մարգարյանի հայտարարություններին՝ ավագանու անդամը շեշտեց, որ բնակիչների կողմից խնամվող սաղարթախիտ շատ գոտիներում քաղքապետարանի աշխատակիցները՝ իբր թե բարեկարգման աշխատանքներ իրականացնելու նպատակով, փորձում են կտրել ծառերը, ինչին ի պատասխան՝ բնակիչները կատաղի կռիվ են մղում իրենց կողմից մշակվող կանաչապատ տարածքների համար:
«ՏԻՄ ընտրություններին ընդառաջ` Տարոն Մարգարյանը մոտեցել էր այդ մարդկանց և շնորհակալություն հայտնել նման աշխատանքի համար, իսկ հիմա, երբ ընրությունները հետևում են, քաղաքապետարանի աշխատակիցները, մուննաթով ու մարդկանց վրա մատ թափ տալով, ասում են, թե տվյալ կանաչապատ տարածքը պետք է բարեկարգվի»,- նշեց բանախոսը:
Դաշինքի ներկայացուցիչ Դավիթ Սանասարյանն էլ հավելեց, որ տպավորությունն այնպիսին է, թե Երևանի քաղաքապետարանը մեկ հոգու կալվածք է:
Հիշեցնենք, որ Երևանի ավագանու առաջին նիստը տեղի էր ունեցել հունիսի 8-ին:
Լուսանկարը՝ PanARMENIAN Photo-ի
