ԱԺ Պաշտպանության, ազգային անվտանգության և ներքին գործերի մշտական հանձնաժողովն օրերս քննարկեց «Ժառանգություն» խմբակցության պատգամավորներ Թևան Պողոսյանի և Ռուբիկ Հակոբյանի կողմից ներկայացված Զինապարտության մասին և Բարձրագույն ու հետբուհական մասնագիտական կրթության մասին օրենքներում փոփոխություններ կատարելու վարբերյալ օրենսդրական նախաձեռնությունը, որով առաջարկվում է հանել պարտադիր զինվորական ծառայության զորակոչից ուսումը շարունակելու նպատակով տարկետում ստանալու իրավունքը և 18 տարին լրացած բոլոր արական սեռի ներկայացուցիչներին զորակոչել բանակ: Առաջիկա տասնօրյա ժամկետում պատրաստ կլինի Կառավարության փաթեթը:
«Առաջին լրատվական»-ը թեմայի շուրջ զրուցեց ՀՀ ԳԱ ակադեմիկոս հասարակական գիտությունների բաժանմունքի ակադեմիկոս-քարտուղար Յուրի Սուվարյանի հետ:
«Իհարկե, լավ կլիներ օրենքը շարունակեր գործել և հատկապես տաղանդավոր երիտասարդները ստանային հնարավորություն՝ շարունակելու գիտությամբ զբաղվել և հասնել արդյունքների, մանավանդ որ մեր երկրի հզորացման համար նույնպես գիտության զարգացում է պետք:
Բայց դրա հետ մեկտեղ նեգատիվ երևույթներ կան, առանձին դեպքերում ասպիրանտուրա են ներթափանցում ոչ այն մարդիկ, որոնք պետք է ասպիրանտուրա ընդունվեն: Լավ կլիներ, որ օրենքից շեղումներ չլինեին»,- նշեց Յուրի Սուվարյանը և հավելեց, որ այս պահին չի կարող առաջարկել ունիվերսալ մի մոդել, որը տաղանդավոր երեխաներին հնարավորություն կտա սովորելու, ուսումը շարունակելու և միաժամանակ բացառելու կոռուպցիան:
Ակադեմիկոսը կարևորեց մեր երկրում ռազմական արտադրության, մեքենաշինության, սարքաշինության, գործիքաշինության զարգացումը. «Եթե մենք ցանկանում ենք ունենալ անկախ պետություն, դրա համար անպայմանորեն պետք է ունենանք հզոր արդյունաբերություն և հատկապես բանակը զինելու համար անհրաժեշտ զինտեխնիկա»:
Նրա խոսքով՝ չի կարելի սպասել, որ Ռուսաստանը կամ այլ երկիր մեզ զենք մատակարարի, մենք ինքներս պետք է ունենանք, իհարկե որոշ բաներ կարող ենք նաև գնել, իսկ սա շատ լուծելի խնդիր է»: Ըստ ակադեմիկոսի՝ քառօրյա պատերազմը թելադրեց, որ այս խնդիրներին անհրաժեշտ է լուծում տալ. «Դրա համար պետք է ինտեգրվեն գիտությունը և արտադրությունը, պետք է ապահովվի պետություն-մասնավոր հատված համագործակցությունը»:
Մանրամասները՝ տեսանյութում:
