Այսօր լրագրողների հետ հանդիպման ժամանակ Երևանի ավագանու ընտրություններում ԲՀԿ ցուցակի 4-րդ հորիզոնականը զբաղեցնող Սերգեյ Բագրատյանը և ԲՀԿ-ական պատգամավոր Վահան Բաբայանը խոսեցին Երևանի ավագանու ընտրությունների և Բագրատյանի հասցեին հնչած մեղադրանքների մասին:
Վահան Բաբայանը նշեց, որ բոլոր հնարավոր միջոցները և բոլոր տարբերակները ԲՀԿ-ն օգտագործել է, որպեսզի հանրությունը տեղեկանա ԲՀԿ ծրագրերին, մոտեցումներին, թե ինչպես է կուսակցությունը պատկերացնում Երևան քաղաքի ապագա կառավարումը թե՛ քաղաքական, թե՛ մունիցիպալ առումով:
«Բազմաթիվ հանդիպումներ ենք ունեցել, նաև բակային հանդիպումներ: Վաղը կկայանա մեր հանրահավաքը՝ մեր քարոզարշավի ամփոփումը: Ես դրական եմ համարում քարոզարշավի ընթացքը և հուսով եմ, որ լավ արդյունք կգրանցենք Երևանի ավագանու ընտրություններում: Մենք բազմաթիվ ուսումնասիրություններ ենք կատարել և աշխատում ենք ընտրական ցուցակների ճշգրտման ուղղությամբ: Շտաբներն ակտիվորեն հսկում են իրավիճակը՝ կապված մարդկանց անօրինական գրանցումների հետ. իրոք եղել են փաստեր, երբ մեկ բնակարանի վրա գրանցվել են 25-30 մարդ: Նման հարցերի վերաբերյալ ահազանգել ենք, նախազգուշական քայլեր ձեռնարկել: ԲՀԿ շտաբները հսկելու են ողջ ընտրական գործընթացը»,- նշեց Վահան Բաբայանը:
Վերջինս անդրադարձավ նաև ընտրակաշառքների և ընտրախախտումների վերաբերյալ հրապարակումներին, որոնցում շրջանառվում է ԲՀԿ անունը, և ասաց, որ պետք է փաստերով խոսել:
Իր հերթին համատեղ ասուլիսի ընթացքում Սերգեյ Բագրատյանն ասաց, որ իրենց քարոզարշավը կառուցված է եղել ակտիվ հանդիպումների՝ բանավեճային հանդիպումների վրա: Կուսակցության խնդիրն է հանրության մեկ երրորդի վստահության քվեն հասցնել մայրաքաղաքի բնակչությանը, ի վերջո՝ դառնալ կարևոր հենաքար:
Բանախոսը վստահեցրեց, որ իսկապես կարողացել են իրենց ծրագրային մոտեցումները ներկայացնել և սպասարկել դրական սպասումները, որոնք երևանցիները ակնկալում են ԲՀԿ-ից: Նրա գնահատմամբ՝ ԲՀԿ քարոզարշավը կոռռեկտ էր և զուսպ:
Այս օրերին իր անձի շուրջ տարածված հրապարակումներին անդրադառնալով՝ նա նշեց, որ իրականում նման երևույթներ չեն կարող լինել:
«Ովքեր իմ կենսագրությանը ծանոթ են, գիտեն, որ երբևէ չի եղել, որ ես պետական կառավարման համակարգում աշխատելիս որևէ նման մոտեցում ունենամ: Դա ապատեղեկատվություն է: ՏԻՄ ընտրությունների ժամանակ է դեպք եղել, որոշակի լարվածություն, Ընտրական օրենսգրքում չտեղավորված երևույթներ, ինչը կարճվել է, որովհետև չի եղել քրեական գործի հարուցման համար անհրաժեշտ ապացույց»,- պարզաբանեց Սերգեյ Բագրատյանը:
Հիշեցնենք. «Առաջին լրատվական»-ը գրել էր, որ Վայոց ձորի աղբյուրների փոխանցմամբ՝ Վայոց ձորի նախկին մարզպետ, Երևանի ավագանու ԲՀԿ ցուցակի 4-րդ հորիզոնականը զբաղեցնող Սերգեյ Բագրատյանն իր պաշտոնավարման տարիներին յուրացրել է 2012 թվականին կառավարության կողմից Վայոց ձորի մարզին հատկացված դիզվառելիքի ապօրինի իրացումից ստացված գումարը: Փաստի առթիվ արդեն հարուցվել է քրգործ: