«Առաջին լրատվական»-ի զրուցակիցն է ԱԺ ԲՀԿ խմբակցության պատգամավոր Ստեփան Մարգարյանը:
– Պարոն Մարգարյան, ինչո՞ւ Գագիկ Ծառուկյանն այս քարոզարշավի հանդիպումներին չի մասնակցում:
– Իսկ ով ասաց, որ քարոզարշավն ավարտվել է: Կմասնակցի: Հիմա բակային հանդիպումներ են, մենք խմբեր ենք ձևավորել: Ծրագրում ունենք նաև ավելի մեծ միջոցառումներ, որոնց ինքը կմասնակցի:
– Հանրահավաքնե՞ր ունեք:
– Այո՛, մենք ունենք հանրահավաքների ծրագիր, օրերը կասենք: Սրանք բակային հանդիպումներ են, պարոն Ծառուկյանը կմասնակցի ավելի մեծ մասշտաբի և համաքաղաքային հանդիպումներին: Չկա այդպիսի բան, որ չի մասնակցելու:
– Ազատության հրապարակո՞ւմ եք անցկացնելու այդ հանրահավաքը:
– Կարծում եմ, այո: Ճիշտն ասած ես տեղյակ չեմ, շտաբն է իրազեկման խնդիրներով զբաղվում: Կարծում եմ, որ` այնտեղ: Ավելի լոկալ հանդիպումներ էլ կլինեն, բայց կարծում եմ, որ Ազատության հրապարակում անելու ենք:
– Գ. Ծառուկյանը միայն Ազատության հրապարակի հանրահավաքի՞ն կմասնակցի:
– Ես չեմ կարող ասել, թե որտեղ ինչպես է լինելու, դա ընթացքում կորոշվի: Պարոն Ծառուկյանը չունի այնպիսի որոշում, որ չմասնակցի հանդիպումներին: Նա մասնակցելու է, բայց թե որ օրը` որտեղ, չեմ կարող ասել:
– 2009թ. Երևանի ավագանու ընտրություններին Գ. Ծառուկյանը Հարություն Քուշկյանի հետ միասին մասնակցում էր քարոզարշավին, նրան ներկայացնում էր որպես ԲՀԿ-ի քաղաքապետի թեկնածու: Այս անգամ ինչո՞ւ այդպիսի մասնակցություն չի ունենում:
– Ճիշտն ասած, չկա այդպիսի պատճառ, մենք գտնում ենք, որ և քաղաքական թիմը պիտի ներկայացնի իր ծրագիրը, և այն մարդիկ, ովքեր ընտրվելու են ավագանու անդամներ: Նրանք պետք է համատեղ ներկայացնեն, ի վերջո` սա ավագանու ընտրություններ են: Ավագանու ընտրությունների արդյունքներից նոր կորոշվի, թե քաղաքապետի ընտրությունն ինչպես է լինելու: Այնպես որ, մենք նպատակահարմար ենք համարում, որ ովքեր մարդկանց հետ անմիջականորեն աշխատելու են, նրանք շփվեն: Գ. Ծառուկյանը կմասնակցի մեծ հանդիպումներին: Գ. Ծառուկյանը նախ հեռուստատեսային ելույթներով է ասել:
– Թե անցած տարվա խորհրդարանական ընտրությունների, թե ՏԻՄ ընտրությունների ժամանակ Գ. Ծառուկյանը մեծամասնական ընտրակարգով կամ քաղաքապետի թեկնածու առաջադրված ԲՀԿ անդամներին անձամբ էր ներկայացնում: Երևանի ավագանու կամ քաղաքապետի ընտրությունները պակաս կարևոր չեն: Նա ինչո՞ւ իր ներկայությամբ չի աջակցում ԲՀԿ-ի քաղաքապետի և ավագանիների թեկնածուներին:
– Մեծամասնական ընտրակարգով առաջադրված թեկնածուներին ներկայացնելը մի փոքր այլ է: Հիմա մենք մեծամասնական թեկնածու չունենք: Երևան քաղաքում կուսակցությունների ընտրությունն է, ոչ թե անձերի:
– Առավել ևս:
– Այդ դեպքում ո՞ւմ պետք է ներկայացնի:
– Կուսակցությանը:
– Կուսակցությանը ներկայացրել է Ազգային ժողովում իր գործունեությամբ, ընտրողների հետ հանդիպումների, քննարկումների ժամանակ: Պարտադիր չէ, որ նա բոլոր բակերում նույն բանը ասի:
– ԲՀԿ պատգամավոր Նաիրա Զոհրաբյանը հայտարարեց, թե այս ընտրություններին ԲՀԿ-ն Երևանի բոլոր ընտրատեղամասերում վերահսկելու և նկարահանելու է ընտրական ողջ գործընթացը, պահելու է բոլորի քվեն: Այնպես են հսկելու, որ բոլոր կուսակցություններին տրված քվեները պահպանվեն: Անցած տարվա խորհրդարանական ընտրություններին նույնպես ԲՀԿ-ն նման վերահսկողություն էր կազմակերպել և ՀՀ գրեթե բոլոր ընտրատեղամասերում նկարահանման սարքեր էր տեղադրել: Ի՞նչ եղան այդ տեսանյութերը: Այդ տեսանյութերում որևէ ընտրակեղծիք չէ՞ր արձանագրվել, ինչո՞ւ ԲՀԿ-ն դրանք չհրապարակեց:
– Տարբեր տեղամասերում, հատկապես շրջաններում ինչ-որ բաներ ֆիքսվել էին, այնպես չէ, որ ոչինչ չէր եղել: Բայց ես կարծում եմ, որ դրանք այնպիսին չէին, որոնք այդ պահին էական ազդեցություն կթողնեին ընտրությունների արդյունքների վրա: Մենք իսկապես համարում ենք, որ խորհրդարանական ընտրությունների ժամանակ մեր ձայներին տեր ենք կանգնել, և հիմա էլ վստահ ենք, որ տեր կկանգնենք: Մենք վերահսկելու ենք, ամեն ինչ անելու ենք և հուսով ենք, որ դա կհաջողվի: Եվ ոչ միայն մենք, քաղաքական համագործակցության շրջանակներում այլ քաղաքական ուժերի հետ համատեղ այս հարցը քննարկում ենք: Եվ ես կարծում եմ, որ ընտրությունները մաքուր անցկացնելու հարցում պետք է բոլորը շահագրգիռ լինեն: Ով շահագրգռված չի լինի` նրա միտքը ծուռ է:
– Եթե էական խախտումներ չէիք արձանագրել, այդ դեպքում ԲՀԿ-ն ինչո՞ւ է երբեմն բարձրաձայնում, որ ընտրությունները կեղծվել են:
– Ես պատասխանեցի այդ հարցին: Մենք համարում ենք, որ մենք տեր ենք կանգնել մեր ձայներին, բայց չենք հավատում, որ երկրում 2,5 մլն ընտրող կար:
– Այսինքն` հավելյալ ընտրողնե՞ր են եղել:
– Այդքան բան: