Ժամեր առաջ «Ժառանգության» վարչության անդամ Հովսեփ Ղազարյանը մի խումբ ընկերների հետ այցելել է «Քաղաքացիական գիտակցություն» ՀԿ գրասենյակ, որից հետո տեղի է ունեցել ծեծկռտուք։ ՀԿ-ի անդամներն ու ղեկավար Նարեկ Սամսոնյանը մարմնական տարբեր վնասվածքներ են ստացել։ Ըստ Նարեկ Սամսոնյանի՝ իրեն ծեծի ենթարկելու պատճառը եղել է օրերս «Առաջին լրատվական»-ի եթերում երբեմնի բուրժուադեմոկրատական հեղափոխության լծված եռյակին սուր քննադատելու պատճառով։
Դեպքը թերևս այդքան արտառոց չէր լինի, եթե այն իրագործվեր նույն եռյակից ասենք ԲՀԿ-ի կողմից, որի նախկին առաջնորդն ու կարկառուն ներկայացուցիչները մշտապես բռնությունների ջատագովն են եղել։ Ըստ Նարեկի՝ ստացվում է՝ եռյակից սուր արձագանքել է այդ քննադատությանը «Ժառանգության» ներկայացուցիչը։ Մի կուսակցություն, որը մշտապես խստագույնս դատապարտել է բռնությունները, աչքի ընկել հանդուրժողականությամբ։
Թե ինչպես է ստացվել, որ նույն կուսակցության երիտխումբը գործել է իշխանությունների ձեռագրով, Հովսեփ Ղազարյանից չհաջողվեց պարզել, նա դարձել էր անհասանելի։ «Ժառանգության» վարչության փոխնախագահ, նախկին պատգամավոր Արմեն Մարտիրոսյանը, «Առաջին լրատվական»-ի հետ զրույցում անդրադառնալով իրենց կուսակցի հարձակմանը «քաղաքական հակառակորդի» վրա, ասաց, որ իրականում այդպես չի եղել։
Սադրել են Նարեկ Սամսոնյանն ու կողմնակիցները. «Հովսեփ Ղազարյանը երիտասարդ է, և իրենց նկատմամբ պրովոկացիա են պատրաստել, եթե ես նախապես իմանայի, կզգուշացնեի, որ դա պրովոկացիա է։ Քաղաքական զրույցի են հրավիրել, Հովսեփ Ղազարյանն ասել է՝ զրուցենք որևէ տեղ, ասել են՝ ինչի՞, մենք սուրճ չունե՞նք, որ ձեզ հյուրասիրենք, ինչի՞ ուրիշ տեղ հանդիպենք։ Տղաներն էլ բարձրացել են, մտել ներս, թե չէ, 15 հոգով հարձակվել են մերոնց վրա։ Մերոնք էլ ոչ թե յոթ, այլ հինգ հոգի են եղել։ Երիտասարդներ են եղել, չեն հասկացել, որ պրովոկացիայի են ենթարկում։ Կանչել են զրույցի ու 15 հոգով հարձակվել 5 հոգու վրա»,- պատմեց Արմեն Մարտիրոսյանը։
Վերջինս ասաց, որ այդ միջադեպի կապակցությամբ ոչինչ էլ չեն պատրաստվում անել. «Պրովոկացիա են կազմակերպել, տղաներն էլ դրան ենթարկվել են, ի՞նչ անենք»։
