Արդբեջանական radioazadlyg.org կայքի փոխանցմամբ, Freedom House միջազգային կազմակերպությունը հետազոտություն է անցկացրել 37 երկրներում` պարզելու ինտերնետային ազատության խնդիրը դրանցում:
Երեկ կազմակերպությունը ներկայացրել է Freedom on the Net 2011 զեկույցը, որում նշված է, որ վերջին երկու տարիների ընթացքում որոշ երկրներում առաջին անգամ քաղաքական վերահսկողություն է սահմանվել ինտերնետի նկատմամբ: Իսկ ահա նրանք, ովքեր առավել վաղ էին դա իրականացրել, այժմ կրկնակի ուժեղացրել են այդ գործընթացը:
Զեկույցում Ադրբեջանն ինտերնետային պլանում նշված է որպես «մասնակի ազատ» երկիր: 100 բալանոց համակարգում Ադրբեջանը ստացել է 46 բալ: Դրանից 15 բալը վկայում է կայքեր մուտք գործելու վրա դրված սահմանափակումների, իսկ 18 բալը` ինտերնետից օգտվելու մարդու իրավունքների խախտման մասին:
Զեկույցում նշված է, որ Ադրբեջանի իշխանությունները լայն գրաքննություն չեն անցկացնում ինտերնետի նկատմամբ: Սակայն 2009 թվականին կառավարությունը ժամանակավորապես արգելել է հասարակության մուտքը մի շարք կայքեր, որոնք քննադատության էին ենթարկել նախագահին:
Իրավիճակն առավել վատթար է Նախիջևանի Ինքնավար Հանրապետությունում, ուր տեղաբնակները չեն կարողացել օգտվել «Ազադլիգ» («Ազատություն») և «Բիզիմ յոլ» («Մեր ճանապարհը») ընդդիմադիր կայքերից: Բոլոր դեպքերում կայքերից օգտվելու անհնարինությունը տևել է օրեր: Սակայն կառավարությունը պաշտոնապես չի ընդունում դա:
2007 թվականից սկսած` Ադրբեջանում լայն զարգացում է ապրել բլոգային ոլորտը: Ի հայտ են եկել նոր բլոգերներ, որոնք լուսաբանում են այնպիսի հարցեր, որոնց անհնար է ականատես լինել ավանդական լրատվամիջոցներում:
Ադրբեջանում գրանցվել է 27.000 բլոգ, որոնց մեծ մասն ադրբեջաներենով է: Դրանցից շուրջ 1000-ն է գրանցվել անգլերեն, ռուսերեն և այլ լեզուներով:
Ինտերնետ տիրույթում ամենաազատական երկիր է ճանաչվել Էստոնիան, ապա հետևում են ԱՄՆ-ը, Գերմանիան, Ավստրալիան և Մեծ Բրիտանիան: Հետնապահների թվում են հայտնվել Իրանը, Մյանման, Կուբան, Չինաստանը և Թունիսը:
Հիշեցնենք, որ օրեր առաջ նույն աղբյուրը հայտնել էր, որ Ադրբեջանի ազգային անվտանգության նախարարությունը և ներքին գործերի նախարարությունը գաղտնալսում են հեռախոսազրույցներն ու ինտերնետային շփումները:
