Գործարարները ողջունում են վարչապետ Հովիկ Աբրահամյանի անցյալ շաբաթավերջին կայացրած որոշումը, որով կառավարության աշխատակազմի ղեկավարին հանձնարարվեց 6 ամսով կասեցնել բոլոր տեսակի տեսչական ստուգումները: «Պետք է ականջալուր լինենք տնտեսվարողներին»,- ասաց վարչապետը: Նիստից հետո էկոնոմիկայի նախարարը կառավարության այս որոշումը որակեց որպես գործարար միջավայրը բարելավելուն ուղղված քայլ:
«Եթե այսօր վարչապետը բարձրացնում է այդ հարցը, ուրեմն դրա անհրաժեշտությունը կա, եղել է: Ես կարծում եմ, որ դա շատ ճիշտ որոշում էր, որը գործարարներին հանգիստ աշխատելու հնարավորություն կտա»,- ասաց ԱԺ պատգամավոր Հակոբ Հակոբյանը («Կիլիկիա» գարեջրի գործարանի սեփականատեր), ում ընկերությունում, հիշեցնենք, ևս ստուգումներ էին իրականացվել հարկային մարմինների կողմից և գործարարը 1,5 միլիոն դոլարին համարժեք դրամով տուգանվել էր:
Հակոբյանը չցանկացավ խոսել արդեն իսկ կայացված տուգանքի մասին, որը վիճարկել է դատարանում: Ասաց, որ 4 ամիս է՝ չի խառնվում իր ընտանիքին պատկանող բիզնեսի գործերին ու մանրամասներին տեղյակ չէ: «Բայց ամեն դեպքում ողջունում եմ վարչապետի որոշումը, շատ ճիշտ որոշում էր»,- հավելեց Հակոբյանը:
Ստուգումներից զերծ չէր մնացել նաև մեկ այլ ՀՀԿ-ական պատգամավոր Աշոտ Աղաբաբյանը: Նա էլ տուգանվել էր 60 մլն դրամով՝ «Հրազդան» տոնավաճառում կատարած ստուգումների արդյունքում: Աղաբաբյանը ևս դիմել է դատարան և սպասում է դատարանի որոշմանը: Նա էլ այսօր մեզ հետ զրույցում, անդրադառնալով վարչապետի որոշմանը, նկատեց. «Չի կարելի դժվարություններ ստեղծել ու հետո հաղթահարել դրանք»,- ասաց Աշոտ Աղաբաբյանը՝ նկատելով, որ ստուգումները լրացուցիչ դժվարություններ են գործարարների համար, որոնք շատ են խանգարում գործարարներին: «Չի կարելի նման ձևով ճնշել գործարարներին, այլ պետք է հնարավորություն տալ նրան աշխատել, շնչել»,- ասաց նա ու անջատեց հեռախոսը:
Նկատենք, սակայն, որ վարչապետը, տեսչական ստուգումները կես տարով առկախելով, հաստատում է, որ ստվերի դեմ իր պայքարը վերջնականապես ձախողվեց:
Լուսանկարը՝ Armenpress-ի