Հանրապետական կուսակցությունից ԱՄՆ նախագահի թեկնածու Ջեբ Բուշը հայտարարել է, որ տնտեսական աճ հնարավոր է այն դեպքում, եթե «ամերիկացիներն ավելի շատ աշխատեն»: Նման կարծիք է նա արտահայտել Նյու Հեմփշիրում արհմիությունների առաջնորդների հետ հանդիպման ժամանակ՝ հաղորդում է ABC News-ը:
«Ես ենթադրում եմ, որ մենք կկարողանանք հասնել ԱՄՆ տնտեսության նվազագույնը 4 տոկոս աճի: Դրա համար մենք պետք է առավել արդյունավետ դառնանք: Դա նշանակում է, որ ամերիկացիները պետք է ավելացնեն աշխատանքային ժամերը՝ բարձր աշխատավարձ ստանալու համար»,- ասել է Ֆլորիդայի նախկին նահանգապետը: Նրա խոսքով՝ միայն այդպես «կարելի կլինի դուրս գալ այն փոսից, որի մեջ այժմ գտնվում է երկիրը»:
Դեմոկրատական կուսակցության ներկայացուցիչները քննադատել են այս հայտարարությունը, իսկ Բուշի օգնականը հստակեցրել է արտահայտության իմաստը, այն է՝ Բուշը նկատի է ունեցել, որ պետությունը վաստակելու ավելի շատ հնարավորություններ պետք է տա:
