Հայտնի մոդելավորող Ջոն Գալյանոն զրկվել է իր իսկ անունը կրող ընկերությունից: Այս մասին հաղորդում է The Daily Telgraph-ը` հղում կատարելով ֆրանսիական նորաձևության աշխարհում իր աղբյուրներին:
Դեռևս այս տարվա մարտի սկզբին Գալյանոն հեռացվել էր Dior նորաձևության տնից, քանի որ ընկերության ղեկավարությունն «անհանդուրժելի էր» համարել նրա պահվածքը:
Հիշեցնենք` Գալյանոն փարիզյան կաֆեներից մեկում հակասեմական արտահայտություններ էր թույլ տվել երկու կանանց նկատմամբ:
Եթե այն ժամանակ նրան զրկել էին Dior-ում զբաղեցրած պաշտոնից, ապա հիմա նա այլևս չի կարող արարել նույնիսկ իր անունը կրող բրենդի տակ: Բանն այն է, որ John Galliano ընկերության 90%-ը պատկանում է Dior-ին: Dior-ի ղեկավարությունն ու Գալյանոն պայմանավորվածություն ունեին, որ մոդելավորողը պետք տարեկան մեկական հավաքածու ներկայացնի Dior և John Galliano բրենդի տակ:
Չնայած այս սկանդալին, John Galliano բրենդի համար լուրջ մրցակցություն է սկսվել և իտալական, մերձավորարևելյան, չինական մի շարք ընկերություններ այն գնելու ցանկություն են հայտնել:
Այս պահին Գալյանոյի դեմ հարուցվել է քրեական գործ: Նրան սպառնում է մինչև կես տարի ազատազրկում և դրամական մեծ տուգանք:
