Ամերիկյան United Airlines ավիաընկերության շուրջ աղմկոտ սկանդալ է առաջացրել աշխատակիցներից մեկը, որը հրաժարվել է ինքնաթիռում եղած մուսուլման կնոջը կոլայի փակ տարա տալ: Ուղեկցորդի խոսքով՝ կինն այն «կարող էր որպես զենք օգտագործել»: Վիրավորված Թահերա Ահմադը կատարվածի մասին գրել է Facebook-ում, հայտնում է Click On Detroit-ը:
«Մեզ արգելված է փակ տարաներ տալ ուղևորներին, քանի որ նրանք կարող են դրանք որպես զենք օգտագործել»,- ցնցված մուսուլման կնոջն ասել է ուղեկցորդը: Այդ բառերից հետո ուղեկցորդը գարեջրի փակ տարա է տվել Թահերա Ահմադի կողքին նստած տղամարդուն:
Երբ կինը մյուս ուղևորների ուշադրությունը հրավիրել է կատարվածին, նրանցից մեկը կոպտորեն ասել է. «Դուք՝ մուսուլմաններդ, լավ կլիներ՝ ձայներդ կտրեիք, քանի որ բոլորը գիտեն, որ մի բան լինելու դեպքում դուք անպայման այդ շիշը կօգտագործեիք մնացածներին վնասելու համար»:
Չնայած ուղևորը վերջում կնոջից ներողություն է խնդրել, իսկ ինքնաթիռի օդաչուն անձամբ է նրան ուղեկցել, որ նա կարողանա բողոք գրել, Թահերա Ահմադն ամեն ինչի մասին գրել է Facebook-ում, հետո Twitter-ի օգտատերերը United Airlines-ը բոյկոտելու կոչով արշավ են սկսել, որը կողմնակիցներ ունի:
