Սիրիայի կանոնավոր բանակի զինծառայողները Հալեպի միջազգային օդանավակայանի և Նեյրաբի ռազմաօդային ուժերի բազայի մերձակայքը ապստամբներից մաքրելու լայնածավալ օպերացիա են սկսել: «Ալ-Վատան» լրատվական ծառայության փոխանցմամբ՝ զորքերին հաջողվել է հակառակորդին դուրս շպրտել 80-րդ ջոկատի տեղակայման շրջանից, որը պաշտպանում էր այդ ռազմավարական օբյեկտները:
Սիրիայի զինվորական հրամանատարության աղբյուրը նշել է, որ վերջին օրերին իրավիճակը նկատելիոեն բարելավել է: Սիրիացի զինծառայողները դուրս են մղել ապստամբներին Ալ-Մասուրանիա թաղամասից և հարվածներ հասցրել նրանց պատվարներին քաղաքի տարբեր մասերում:
Դամասկոսի մոտ բանակային ստորաբաժանումները հետապնդում են զինված ծայրահեղականներին մի շարք շրջանների պլանտացիաներում: Նրանց մի քանի ջոկատներ շրջապատվել են ու ոչնչացվել:
Տեղեկություններ են ստացվում նաև Դամասկոսի մոտ գտնվող պաղեստինցի փախստականների «Յարմուկ» ճամբարի հյուսիսային հատվածում փոխհրաձգությունների վերսկսման մասին:
Քաղաքի հարավային ծայրամասում բախումները մեկ թեժանում են, մեկ հանդարտվում:
Սիրիայի արևելքում խմբավորումները սպառնում են Դեր Զորի գրավմամբ: Նրանց դեմ ռազմական գործողություններում մասնակցում է ավիացիան, որն օդից հարձակում է իրականացրել գրոհայինների դիրքերին քաղաքի մերձակայքում:
AFP գործակալության փոխանցմամբ՝ վերջին 24 ժամվա ընթացքում Սիրիայում զոհվել է 29 խաղաղ բնակիչ, 35 ապստամբ և կանոնավոր բանակի 23 զինծառայող:
