Մեքսիկայի Տամաուլիպաս նահանգի Ռեյնոս քաղաքում տեղի են ունեցել զինված բախումներ նարկոկարտելի ու ոստիկանության միջև՝ հայտնում է Reutersը:
Պատճառը «Գոլֆո» նարկոկարտելի առաջնորդ Էլ Գաֆեի (El Gafe) կալանավորումն էր, որին փորձել էին դաշնային ուժերից ու ծովային հետևակից խլել նրա կողմնակիցները: Այդուհանդերձ, Էլ Գաֆեին հաջողվել էր հասցնել երկրի մայրաքաղաք Մեխիկո:
Ապրիլի 17-ին սկսված զինված բախումների արդյունքում սպանվել էին 3 ենթադրյալ հարձակվողներ, վիրավորվել էին 2 ոստիկաններ, հրկիզվել են մի քանի մեքենաներ։ Չհաստատված տեղեկություններով՝ սպանվել են նաև 2 անցորդներ։
Ռեյնոսի բնակչությունը մոտ 600 հազար է: Անցած տարի քաղաքը, որը մոտ է ԱՄՆ-ի հետ սահմանին, դարձել էր «Գոլֆո» ու «Լոս Սետաս» մրցակից հանցախմբերի դաժան թատերաբեմ:
«Գոլֆո» կարտելը հիմնականում տեղակայված է Գերերո նահանգի տարածքում:
