Այսօր կկայանա Չեմպիոնների Լիգայի գավաթի ընթացիկ խաղարկության 1/8 եզրափակիչի երկրորդ խաղային օրը: Դոնեցկի «Շախտյոր»-ը «Դոնբաս Արենա» մարզադաշտում ուժերն է չափելու Դորտմունդի «Բորուսիա»-ի հետ:
Երկու թիմերն էլ կադրային խնդիրներ ունեն: Դաշտի տերերի կազմում բացակայում է կենտրոնական պաշտպան Ալեքսանդր Կուչերը, ով որակազրկված է: Հարցականի տակ է Տոմաշ Հյուբշմանի մասնակցությունը խաղին: Ֆուտբոլիստը նոր է ապաքինվել: «Անժի» տեղափոխված Վիլիանին, ամենայն հավանականությամբ, կփոխարինի թիմի նորեկ Թայսոնը: «Բորուսիա»-ի կազմում բացակայում է Իլկայ Գյունդողանը: Սա կարելի է վատ նշան համարել հյուրերի համար, քանի որ բոլոր 5 հանդիպումներին, որոնց Գյունդողանը տարբեր պատճառներով չի մասնակցել, «Բորուսիա»-ն պարտվել է: Դոնեցկ չի ժամանել Քևին Գրոսկրոյցը:
Միրչա Լուչեսկու. «Մենք միշտ հաջող հանդիպումներ ենք անցկացնում գերմանական թիմերի դեմ: Պարտության ենք մատնել «Շալկե»-ին, «Շտուտգարտ»-ին, «Վերդեր»-ին: Սակայն խաղաոճով «Բորուսիա»-ն ավելի նման է լատինամերիկյան թիմերին»:
Յուրգեն Կլոպ. ««Շախտյոր»-ում բարձրակարգ ֆուտբոլիստներ են հանդես գալիս: Դա վերաբերում է ինչպես հիմնական կազմին, այպես էլ պահեստայինների նստարանին: Նրանց կիսապաշտպանությունը շատ տպավորիչ ֆուտբոլ է ցուցադրում: Առանձնանում է հատկապես Ֆերնանդինյոն: «Շախտյոր»-ի դեմ խաղը լուրջ փորձություն է մեզ համար»:
Թիմերը հանդիպել են են 2 անգամ՝ ՉԼ գավաթի խաղարկության որակավորման փուլում՝ 2001թ.: Երկու դեպքերում էլ առավելության է հասել «Բորուսիա»-ն՝ 2:0 և 1:3 հաշիվներով: Բացի այդ, եվրագավաթների խաղարկություններում ոչ մի ուկրաինական թիմի չի հաջողվել առավելության հասնել «Բորուսիա»-ի նկատմամբ (5 հաղթանակ, 1 ոչ-ոքի): «Բորուսիա»-ն այն 4 թիմերից մեկն է, որը չի պարտվել ՉԼ գավաթի ընթացիկ խաղարկությունում: Անպարտելի են նաև «Յուվենթուս»-ը, «Շալկե»-ն ու «Մալագա»-ն: ՉԼ վերջին 19 արտագնա խաղերում «Բորուսիա»-ն միայն մեկ անգամ է կարողցաել անառիկ պահել սեփական դարպասը: Բացի այդ, գերմանկաան թիմի ֆուտբոլիստ Մարկո Ռոյսը ՉԼ գավաթի ընթացիկ խաղարկության բոլոր արտագնա հանդիպումներում գոլի հեղինակ է դարձել:
Խաղը կսպասարկի բրիտանական մրցավարական անձնակազմը՝ 41-ամյա մրցավար Հոուարդ Ուեբի գլխավորությամբ:
