Այսօր, ինչպես արդեն հայտնի է, Եվրոպական ժողովրդական կուսակցությունը Ցեղասպանության 100-րդ տարելիցին նվիրված բանաձև է ընդունել: Բանաձևը կրում է «Հայկական ցեղասպանությունը և եվրոպական արժեքները» խորագիրը, որով ԵԺԿ-ն վերահաստատում է ու դատապարտում Հայոց ցեղասպանության և հայ ժողովրդի բռնի տեղահանման փաստը: Բանաձևի տեքստը կազմել և համաժողովին են ներկայացրել Հայաստանից ԵԺԿ անդամ երեք՝ ՀՀԿ, ՕԵԿ և «Ժառանգություն» կուսակցության ներկայացուցիչները:
Բանաձևի ընդունումից հետո «Առաջին լրատվական»-ը մի քանի հարց ուղղեց Հայաստանից ԵԺԿ անդամ կուսակցության՝ ՀՀԿ ներկայացուցիչ, ՀՀ ԿԳ նախարար Արմեն Աշոտյանին, որը դեռևս գտնվում է Բրյուսելում:
– Պարոն Աշոտյան, ինչպե՞ս եք գնահատում ԵԺԿ-ի քաղաքական խորհրդի այս բանաձևը, և ինչպե՞ս հաջողվեց ՀՀ ներքաղաքական կյանքում միմյանց չհանդուրժող կուսակցությունների ներկայացուցիչներով համաձայնության գալ բանաձևի միասնական տեքստի շուրջ:
– ԵԺԿ քաղաքական համաժողովի կողմից այսօր հավանության արժանացած բանաձևը հեղինակվել է Հայաստանից ԵԺԿ անդամ երեք կուսակցությունների կողմից: Դեռ հունվար ամսին Րաֆֆի Հովհաննիսյանը համաժողովին ներկայացրել էր բանաձևի իր տարբերակը: Գոյություն ուներ նաև Հանրապետական կուսակցության կողմից մշակված բանաձևը, և միասնականացնելով մեր ջանքերը՝ մեզ հաջողվեց գալ ընդհանուր հայտարարի, ընդհանուր տեքստի, որը ներկայացվեց եվրոպացի մեր գործընկերներին:
Իհարկե, շատ գովելի և աննախադեպ երևույթ էր մեր քաղաքական մշակույթի մեջ, որը գալիս է ապացուցելու, որ հանուն պետական և ազգային շահերի մենք կարող ենք և պարտավոր ենք մի կողմ դնել կուսակցական տարաձայնությունները, և նման հարցերում, ինչպիսիք են Ցեղասպանությունը, ԼՂ հիմնախնդիրը, հանդես գալ միասնական տեսակետով: Եվ սրա համար ես ուզում եմ շնորհակալություն հայտնել Րաֆֆի Հովհաննիսյանին, Մհեր Շահգելդյանին այս համատեղ աշխատանքի համար: Այս բանաձևի տեքստի հետ կապված մեր հակասությունները մենք թողեցինք Երևանում և կարողացանք միավորվել կարևորագույն հարցի շուրջ:
Բանաձևը, որը ընդունվել է Եվրոպայի ամենախոշոր քաղաքական կառույցներից մեկի՝ ԵԺԿ-ի կողմից, շատ լուրջ քաղաքական փաստաթուղթ է, որը խարսխված է համահայկական հռչակագրի դրույթների վրա: Այն հնարավորություն է տալու ապագայում աշխատել եվրոպական երկրներում ազգային մակարդակով Հայոց ցեղասպանության ճանաչման, դատապարտման և ժխտողականության դատապարտման ու միջազգայնացման ուղղությամբ: Այսօր արդեն կարող ենք փաստել, որ եվրոպական քաղաքական վերնախավում նման խոշոր քաղաքական կառույցի կողմից Հայոց ցեղասպանության 100-րդ տարելիցին ընդառաջ՝ ձևավորվեց մի հստակ արժեհամակարգային մոտեցում, և պատահական չէ, որ բանաձևը վերնագրված է «Հայոց ցեղասպանությունը և եվրոպական արժեքները»:
– Իսկ ինչպե՞ս ընունվեց բանաձևը ԵԺԿ անդամ այլ պետությունների ներկայացուցիչների կողմից: Արդյոք եղե՞լ են դեմ արտահայտվողներ:
– Բանաձևի նախագիծը քննարկվել է մինչև համաժողովը: ԵԺԿ անդամ մեր գործընկերների, ԵԺԿ կենտրոնակայանի, նախագահության և քարտուղարության հետ մենք գրեթե ամենօրյա աշխատանք ենք տարել: Հայկական կուսակցությունների յուրաքանչյուր անդամ իր ջանքերն է ներդրել, որպեսզի իր գործընկերներին միավորի այս հարցի շուրջ: Բանաձևը, որն այսօր պսակվեց հաջողությամբ, անցավ առանց դեմ ձայների:
– Հնարավո՞ր է նաև այս բանաձևի ընդունումից հետո՝ ապրիլի 24-ին ԵԺԿ-ն ամենաբարձր մակարդակով պատվիրակություն գործուղի Հայաստան: Այս հարցի հետ կապված կա՞ որոշակի հստակություն: Պայմանավորվածություններ ձեռք բերվե՞լ են:
– Այո, հստակություն կա, բայց, ցավոք, ես իրավասու չեմ ձեզ այս հարցի հետ կապված տեղեկություններ հաղորդելու: Բայց շատ մեծ հավանականություն կա, որ պատվիրակություն կլինի Հայաստանում: Հետևեք իրադարձություններին և կտեսնեք, որ ԵԺԿ-ն հետևողական է այս խնդրի հետ կապված նաև ամենաբարձր մակարդակով:
– Ձեր կարծիքով՝ ինչպիսի՞ ազդեցություն դեռ կունենա այս բանաձևը Ցեղասպանության ճանաչման հարցում: Կնպաստի՞
արդյոք այս բանաձևը, որպեսզի նույն ԵԺԿ անդամ պետությունների կողմից նույնպես ճանաչվի և դատապարտվի Հայոց ցեղասպանության փաստը:
– Այս բանաձևը լրջագույն կռվան է և լրջագույն փաստարկ հետագա գործողությունների համար տարբեր եվրոպական և ազգային մակարդակներում գործողություններ կատարելու նպատակով: Այս բանաձևը պետք է ճիշտ օգտագործել: Այն պետք է հանրահռչակվի և դառնա դիվանագիտական թղթապանակի կարևորագույն փաստաթղթերից մեկը: Վստահ եմ, որ ճիշտ կազմակերպված և հետևողական աշխատանքի պարագայում սա մեր վերջին հաջողությունը չի լինի:
– Իսկ ի՞նչ այլ հարցեր են քննարկվել ԵԺԿ համաժողովում:
– ԵԺԿ քաղաքական համաժողովը քննարկեց բազմաթիվ հարցեր: Մասնավորապես՝ ԵԺԿ համագումարի հետ կապված, որը տեղի է ունենալու Իսպանիայում: Քննարկումներ եղան օրակարգի հետ կապված: Քննարկվեցին նաև քաղաքական նշանակություն ունեցող այլ բանաձևեր այլ տարածաշրջանների վերաբերյալ:
