Հայաստանի աշխատավորական սոցիալիստական կուսակցությունը առաջադրված թեկնածուներից սատարում է «Ժառանագություն» կուսակցության առաջնորդ, ՀՀ նախագահի թեկնածու Րաֆֆի Հովհաննիսյանի թեկնածությունը:
ՀԱՍԿ Կենտրոնական կոմիտեի տարածած հաղորդագրության մեջ ասվում է. «Հայաստանի Հանրապետությունը հայտնվել է ճակատագրական ճամփաբաժնի առջև: Շարունակել վերջին տարիներին վարվող քաղաքականությունը` նշանակում է երկիրը հասցնել վերջնական կործանման: Ուստի նոր ճանապարհի ընտրությունը հայրենիքի փրկության միակ հնարավորությունն է: Իսկ նոր ճանապարհով կարող են առաջնորդել միայն նոր մտածողությամբ նոր իշխանությունները:
Այս պահին ստեղծված իրավիճակի և առկա իրողությունների պայմաններում մեր համոզմամբ նորի` մեզ բոլորիս անչափ անհրաժեշտ ապահով և անվտանգ հայրենիքի,ազատ և բարեկեցիկ կյանքի,հիրավի նոր և արդար Հայաստանի,որակյալ և կենսունակ պետության երաշխավոր կարող է լինել միայն ՀՀ նախագահի թեկնածու, «Ժառանգություն» կուսակցության առաջնորդ Րաֆֆի Հովհաննիսյանը, բնականաբար`որոշակի ծրագրերի և որոշակի թիմի առկայության պայմաններում:
Ուստի,Հայաստանի աշխատավորական սոցիալիստական կուսակցությունն իր պատրաստակամությունն է հայտնում առաջիկա նախագահական ընտրություններում պաշտպանելու Րաֆֆի Հովհաննիսյանի թեկնածությունը և իր ունեցած հնարավոր բոլոր միջոցներով աջակցելու նրա հաղթանակին»:
