Անձինք, ովքեր ձգտում են Սիրիայի և Իրաքի տարածքում հայտնվել՝ համալրելու ահաբեկչական խմբավորումների շարքերը, առավել հաճախ օգտվում են զբոսանավերից: Այս մասին Associated Press-ին հայտնել է Ինտերպոլի գլխավոր քարտուղարի պաշտոնը լքող Ռոբերտ Նոբլը:
Նրա խոսքով՝ Սիրիայի և Իրաքի դեպքում նման անձինք հիմնականում ընտրում են Թուրքիան:
Նոբլի խոսքով՝ ահաբեկչական կազմակերպությունների պոտենցիալ անդամերը հասկանում են, որ միջազգային օդանավակայաններում հավաքված են տվյալների բազաներ, որոնք թույլ չեն տա նրանց հայտնվել օդանավերում, իսկ այս դեպքում նման բազաներ գոյություն չունեն:
«Ունենք ապացույցներ, որ այդ անձինք, հատկապես Եվրոպայից, այդ նպատակով գնում են հիմնականում թուրքական Իզմիր նավահանգիստ»,- հայտարարել է Ինտերպոլի ղեկավարը:
Նրա խոսքով՝ պոտենցիալ ահաբեկիչների տեղաշարժը կանխելու համար պետք է ստեղծվի տվյալների փոխանակման համակարգ տարածաշրջանների, ինչպես նաև անվտանգության բոլոր ծառայությունների միջև:
