Վրաստանի նախագահ Միխեիլ Սաակաշվիլին հինգշաբթի հայտարարել է, որ չի պատրաստվում հեռանալ քաղաքականությունից 2013-ին իր նախագահական լիազորությունների ժամկետի լրանալուց հետո, և բոլոր ջանքերը կներդնի իր «Միացյալ ազգային շարժում» կուսակցության պահպանման և ուժեղացման համար: Այս մասին հայտնում է Novosti Gruziya գործակալությունը:
«Ես կմնամ քաղաքականության մեջ: Կան մարդիկ, որոնք երազում են «Միացյալ ազգային շարժման» կործանման մասին, սակայն նման բան տեղի չի ունենա: Ո´չ ես, ո´չ էլ իմ կուսակցությունը Վրաստանի քաղաքական դաշտից չենք անհետանա… Ես կարծում եմ, որ «Ազգային շարժումը» դեռ կընդլայնվի»,- ասել է Սաակաշվիլին բրիֆինգի ժամանակ:
Սաակաշվիլիի խոսքով՝ իր գլխավոր հանձնարարությունն է կուսակցության սկսած բարեփոխումներն ավարտին հասցնելը և պետության փլուզում թույլ չտալը: Նա կտրականապես հերքել է շշուկներն այն մասին, որ իբր թե պատրաստվում է լքել Վրաստանը:
«Ես այստեղ ծնվել եմ, այստեղ եմ ապրում, այստեղ էլ կմեռնեմ: Իսկ մինչ մեռնելը մտադիր եմ գործել: Եվ ինչպես չեղավ աշխարհի վերջը, այնպես էլ չի լինի «Միացյալ ազգային շարժման» վերջը»,- ընդգծել է նա:
Սաակաշվիլին նաև հայտարարել է, որ պատրաստ է զրկվել նախագահական բոլոր արտոնություններից, եթե խորհրդարանը նման որոշում կայացնի, եթե նույնիսկ նա զրկվի անվտանգությունից և տրանսորտային միջոցներով ապահովումից: «Ինձ ինքնաթիռներ, զրահապատ մեքենաներ պետք չեն…Մայրիկիցս կվերցնեմ մեքենան և դրանով կշրջեմ երկրում ու կհանդիպեմ ժողովրդին»,- ասել է Սաակաշվիլին: