Պանիր արտադրողներին աղիքային ցուպիկի համար տուգանելուց հետո ոլորտում նոր զարգացումներ չկան: Ինչպես «Առաջին լրատվական»-ին հայտնեց Պանրագործների ասոցիացիայի տնօրեն Արմեն Գիգոյանը, Սննդի անվտանգության պետական ծառայության «բացահայտումներից» հետո «Չանախ» տեսակի պանրի սպառումը որոշ ժամանակով նվազել էր, բայց արդեն վերականգնվել է:
Սակայն, ըստ Գիգոյանի, տուժել են ոչ այնքան հենց «Չանախ» տեսակի պանիր արտադրողները, որքան «Չանախ» ընկերությունը, որը կաթնամթերք արտադրող է. ««Չանախ» ֆիրմայի առևտուրն է նվազել»:
Ա. Գիգոյանը հայտնեց, որ նոր ստուգումներ չկան, սակայն «երբ էլ մտնեն, չափանիշների որևէ խախտում կգտնեն, օրինակ՝ դուռը ճիշտ տեղում չի տեղադրված»: Ըստ նրա՝ խնդիրն ավելի գլոբալ է. ծառայությունը պետք է ոչ թե միանգամից տուգանի արտադրողներին, այլ նախ` զգուշացնի, ցույց տա խախտումը և դա չվերացնելու դեպքում` երկրորդ այցելության ժամանակ միայն տուգանի:
Ա. Գիգոյանը նաև նշեց, որ Ամանորի հետ կապված ակնկալիքներ պանիր արտադրողները չունեն, բայց տոներից հետո փոփոխություններ են ակնկալվում. «Տարին լավը չէր, պանիր քիչ է արտադրվել, քանի որ կաթի քանակի հետ խնդիր եղավ` այն քիչ էր»:
Հարցին՝ հնարավո՞ր է, որ պանրի թանկացումներ լինեն, ասոցիացիայի ղեկավարը նշեց` դա կախված է շուկայից: