Տեխասում Brother’s Pizza Express ռեստորանի մենեջերը վռնդել է Միրանդա Սովերսին և նրա երեք երեխաներին ռեստորանից այն բանից հետո, երբ կինը ռեստորանում փոխել է իր չորս ամսական որդու տակդիրը: Ռեստորանում չգտնելով որևէ սենյակ, որտեղ կարելի է երեխայի տակդիրը փոխել՝ կինը դա արել է հենց իր սեղանի վրա: Այս մասին է հաղորդում Metro-ն:
Տհաճ հոտից բողոքել են ռեստորանի այցելուները: Հաստատության մենեջերը, մեկնաբանելով դեպքը, ասել է. «Ես ամենաքիչն ուզում եմ, որպեսզի հաճախորդները հոտից սրտխառնոց ունենան»: Ընտանիքին վռնդելուց առաջ աշխատակիցները նրանց ուտելիքը դուրս տանելու համար փաթեթավորել են:
Հարկ է նշել, որ ԱՄՆ-ում վերջին շրջանում տարածում է գտնում childfree-ռեստորանների և սրճարանների գաղափարը: Օրերս հայտնի է դարձել, որ կալիֆոռնիական հայտնի ռեստորաններից մեկի սեփականատերն արգելել է իր հաստատություն մուտք գործել կամակոր երեխաների հետ: Դրանից մի քանի տարի առաջ նա արգելել է իր ռեստորան մտնել մանկասայլակներով և հավաքել է մանկական բոլոր աթոռները:
