Ազգային ինքնորոշում միավորման` հունիսի 14 –ին հրավիրած համահավաքում օրակարգային մի շարք հարցեր էին` Մաքսային միությանն անդամակցման մարտահրավերները, Ցեղասպանության հարյուրամյա տարելիցին ընդառաջ մեր քայլերը, Սահմանադրական բարեփոխումներ, ինչպես նաև` ԱԻՄ ներկայացուցչական խորհրդի ընտրություններ: ԱԻՄ առաջնորդ Պարույր Հայրիկյանն «Առաջին լրատվական»-ի հետ զրույցում նշեց, որ նախատեսում են նաև «Ոչ մաքսային միությանը» կարգախոսով երթ:
«Դա մեր հերթական միջոցառումներից մեկն է: Մենք «ոչ» ենք ասում Մաքսային միությանը, բոլոր նրանց, ովքեր «ոչ» չեն ասում` հակադրվելով անկախության հանրաքվեին, Հայաստանի` մինչև նախորդ տարվա սեպտեմբերի 3-ը որդեգրած արտաքին ռազմավարությանը: Բոլոր հակադրվողները, անկախ նրանից, ինչ կուսակցության են պատկանում, հանդիսանում են կրեմլյան, պուտինյան կուսակցության ներկայացուցիչներ»,- ասաց նա: Հայրիկյանը նշեց, որ իրենք ցանկանում են արդարությանը, ճշմարտությանը, գեղեցիկին ու բարուն հավատացող մարդկանց ներկայանալ, հույս ներշնչել, որ նրանք մենակ չեն, իսկ նրանք մեծամասնություն են` 60 – 70 տոկոս` այս ծանր քարոզչության պայմաններում:
Դիտարկմանը, թե Եվրասիական տնտեսական միության կայացման հարցում կասկածներ կան, Հայրիկյանը արձագանքեց. «Արևմուտքը տնտեսապես ութ անգամ ավելի հզոր է, քան Եվրասիական տնտեսական միությունը` իր ողջ ներուժով: Որևէ առողջ բանականության տեր մարդ քաղաքական հարցերից գոնե խոսեր կամ «անվտանգությունից», երբ մեզ գժի տեղ են դրել, Ռուսաստանը զենք է մատակարարում մեզ ոչնչացնել սպառնացողներին, և մենք ասում ենք ` մեր բարեկամն է: Մեզ իսկապես գժի տեղ են դրել: Երբ տնտեսականի մասին է խոսքը` ինչպե՞ս կարող է խեղճուկրակ, նվազ, միայն հումքից կախվածություն ունեցող տնտեսությունը համադրելի համարել եվրոպական տեխնոլոգիական ամենաբարձր մակարդակի տնտեսության հետ»: ԱԻՄ առաջնորդը շեշտեց, թե բոլոր նրանք, ովքեր խոսում են տնտեսական առաջընթացի հնարավորության մասին, պարզապես տգետ են:
«Ռոսիյա սեգոդնյա» միջազգային լրատվական գործակալության տնօրեն Դմիտրի Կիսելյովի հայտարարությանն անդրադառնալով` Հայրիկյանը նշեց, թե ուրախ է, որ նաև պուտինյան կուսակցություններից արձագանքողներ կան` ազգային արժանապատվության բացահայտ կամ ոչ բացահայտ գիտակցումով` նկատի ունենալով ԱԺ նախագահ Գալուստ Սահակյանին:
