ՀՀ փոխվարչապետ, Տնտեսական համագործակցության հարցերով հայ-իրաքյան միջկառավարական համատեղ հանձնաժողովի համանախագահ Արմեն Գևորգյանի և Իրաքի խորհրդարանի առաջին փոխնախագահ Քուսեյ ալ Սիհաիլիի` այսօր Բաղդադում կայացած հանդիպմանը քնննարկվեցին խորհրդարանական կապերի ակտիվացման, միջազգային կազմակերպությունների շրջանակում համագործակցության հարցեր:
Ա. Գևորգյանը իրաքյան կողմին փոխանցել է Հայաստանի ԱԺ նախագահի բարեմաղթանքները: Փոխվարչապետը նշել է երկու երկրների խորհրդարանների միջև ավանդական բարեկամական կապերի մասին` բարձր գնահատելով հարաբերությունների զարգացման և ամրապնդման գործում խորհրդարանական համագործակցության դերը:
Քուսեյ ալ Սիհաիլին իր հերթին նշել է հարաբերությունները զարգացնելու իրաքյան կողմի շահագրգռվածությունը` տեղեկացնելով, որ առաջիկայում կձևավորվի իրաքա-հայկական խորհրդարանական բարեկամության խումբը, որն իր գործունեությամբ կնպաստի միջխորհրդարանական հարաբերությունների ակտիվացմանը: Նա ավելացրեց, որ ոչինչ չի խանգարում բարեկամ հայ ժողովրդի հետ կապերը խորացնելուն:
Խորհրդարանի փոխնախագահը նաև ջերմությամբ է խոսել իրաքահայ համայնքի մասին` նկատելով, որ երկրում ամենուր նկատելի է հայերի հետքը: Նա նշեց հայ համայնքի դրական դերը երկրի մի շարք ոլորտների զարգացման գործում` ընդգծելով, որ Իրաքի ժողովուրդը բարձր է գնահատում հայերի հետ ունեցած դարավոր բարեկամությունը:
Երկուստեք համոզմունք է հայտնվել նաև, որ խորհրդարանական դիվանագիտությունը կարևոր օղակ կարող է հանդիսանալ հարաբերություններին նոր թափ հաղորդելու համար: Կողմերը մտքեր են փոխանակել Իրաքի կողմից իրականացվող քաղաքականության վերաբերյալ:
ՏԿՆ հասարակայնության հետ կապերի բաժնից «Առաջին լրատվական»-ին հայտնում են, որ այսօր Բաղդադում տեղի է ունեցել նաև Տնտեսական համագործակցության հարցերով հայ-իրաքյան միջկառավարական համատեղ հանձնաժողովի նիստում համաձայնեցված փաստաթղթերի ստորագրման պաշտոնական արարողությունը: Միջկառավարական հանձնաժողովի համանախագահներ` ՀՀ փոխվարչապետ, տարածքային կառավարման նախարար Արմեն Գևորգյանը և ԻՀ փոխվարչապետ Ռոշ Նուրի Շաուեյսն ստորագրել են նիստի արձանագրությունը, երկու երկրների կառավարությունների միջև ստորագրվեց նաև «Հայաստանի Հանրապետության և Իրաքի Հանրապետության միջև ներդրումների խրախուսման և փոխադարձ պաշտպանության մասին» համաձայնագիրը:
Բաղդադից փոխվարչապետը մեկնել է Սուլեյմանիա, որտեղ նախատեսվում է նրա հանդիպումը Իրաքի Հանրապետության նախագահ Ջալալ Թալաբանիի հետ:
