Վրացական «apsny.ge» լրատվական կայքի փոխանցմամբ, ԵԱՀԿ գործող նախագահ, Լիտվայի արտգործնախարար Աուդրոնյուս Աժուբալիսը հաջորդ շաբաթ այցելելու է Հարավային Կովկաս` քննարկելու ԵԱՀԿ գործունեությունը տարածաշրջանում և 2011 թվականին լիտվական նախագահության առաջնահերթ խնդիրները:
Աժուբալիսը նախ մարտի 13-14-ին այցելելու է Բաքու, ապա մարտի 15-16-ին` Թբիլիսի և վերջապես մարտի 17-18-ին` Երևան: Իր հարավկովկասյան այցի շրջանակներում Աժուբալիսը մտադիր է հանդիպումներ ունենալ Հայաստանի ու Ադրբեջանի նախագահների, Վրաստանի վարչապետի, ինչպես նաև հարավկովկասյան այդ երեք երկրների արտգործնախարարների, քաղաքական կուսակցությունների ու հասարակական կազմակերպությունների, մամուլի ներկայացուցիչների հետ:
Նշվում է, որ քննարկման հիմնական թեմաներից մեկը հանդիսանալու է ղարաբաղյան հակամարտության կարգավորումը:
Հիշեցնենք, որ ԵԱՀԿ-ն իր մեջ ներառում է Եվրոպայի, Հյուսիսային Ամերիկայի ու Կենտրոնական Ասիայի 56 երկրների: Հայաստանը ԵԱՀԿ-ին անդամակցել է 1992 թվականի հունվարի 30-ին:
