ՆԱՏՕ-ի գլխավոր քարտուղար Անդերս Ֆոգ Ռասմուսենը Հյուսիսատլանտյան դաշինքի պատվիրակության կազմում ժամանել է Քաբուլ:
Ինչպես հաղորդում է «Ազատություն» ռադիոկայանի ռուսական ծառայությունը, այցի շրջանակներում բանակցություններ են նախատեսվում Աֆղանստանի նախագահ Համիդ Քարզայի, կառավարության և խորհրդարանի անդամների հետ: Քաբուլում լրագրողների հետ հանդիպմանը Ռասմուսենն ընդգծել է, որ միջազգային հանրությունը չի հրաժարվի աֆղաններին օգնել իրենց պետության զարգացման գործում:
ՆԱՏՕ-ի ղեկավարը վստահություն է հայտնել, որ Աֆղանստանի անվտանգության ծառայություններն ի վիճակի կլինեն վերահսկել իրավիճակը 2014 թվից հետո: Ընդ որում, Ռասմուսենը նշել է, որ Հյուսիսատլանտյան դաշինքը կշարունակի ջանքերը աֆղան զինծառայողներին և ոստիկաններին պատրաստելու ուղղությամբ:
