Ռամիլ Սաֆարովի գործի հետ կապված` պետք է 2 հայց ներկայացվի. սպանված հայ սպա Գուրգեն Մարգարյանի իրավահաջորդները պետք է Ադրբեջանի և Հունգարիայի դեմ հայց ներկայացնեն Ստրասբուրգում գտնվող Մարդու իրավունքների եվրոպական դատարան, իսկ Հայաստան պետությունը պետք է հայց ներկայացնի Հաագայի տրիբունալ՝ ընդդեմ Ադրբեջանի կողմից գործված ահաբեկչության: Այսօր լրագրողների հետ հանդիպմանը այս մասին հայտարարեց Եվրոպայի հայկական միությունների ֆորումի (ԵՀՄՖ) նախագահ Աշոտ Գրիգորյանը: Նա շեշտեց, որ Ստրասբուրգ ներկայացվելիք հայցը պետք է լինի միայն Գուրգեն Մարգարյանի իրավահաջորդների կողմից և ոչ մի դեպքում` Հայաստանի Հանրապետության: Այդ հանցագործությունը լիովին Ստրասբուրգի կոնվենցիայի ներքո է, որով արգելվում են այդ կարգի էքստրադիցիան և ներումը:
Ըստ Գրիգորյանի՝ ֆորումի իրավաբանները ուսումնասիրել են գործը և գտնում են, որ ՀՀ-ում ամբողջական ճիշտ գնահատական չի տրվել Սաֆարովի գործած ոճրին ու նրա արտահանձնմանը: Իրավաբանները վստահ են՝ քանի որ Սաֆարովը Հունգարիա գործուղվել էր պետության կողմից, նա կատարում էր պետության պատվերը, այսինքն` դա պետական պատվեր է, պետական հանցագործություն, պետական ահաբեկչություն:
«Այսինքն` Ադրբեջանը և նրա նախագահ Ալիևը մեղադրվում են պետական ահաբեկչության մեջ»,- ընդգծեց Ա. Գրիգորյանը՝ հիշեցնելով նաև, որ մինչ այդ Սաֆարովը թուրքական զորամասում հատուկ վարժանք էր անցել:
Ա. Գրիգորյանի կարծիքով՝ Հունգարիայի վարչապետ Վիկտոր Օրբանը պետք է ետ բերի և բանտ նստեցնի Սաֆարովին ու ներողություն խնդրի 10 մլն հայերից:
Անդրադառնալով ՀՀ ԱԳՆ-ի գործողություններին՝ ֆորումի նախագահը հայտարարեց, որ այն ոչինչ չի անում, լիովին «ավերված» է, նախարար Էդվարդ Նալբանդյանը «կայֆ է բռնում», ոչ մի հարցում չի համագործակցում հայկական միությունների հետ և նույնիսկ տեղ-տեղ խանգարում է: Նրա բնորոշմամբ` այս եզակի դեպքում Ալիևը խելոք բան է արել՝ գործեց այն ժամանակ, երբ ՀՀ իշխանությունները խորը հանգստի մեջ էին, տարբեր խաղատներում էին, իսկ Էդվարդ Նալբանդյանը ուսումնասիրում էր կենգուրուներին՝ պարզելու, թե ինչպես են կենդանիների ձագերը կաթ ուտում:
Միաժամանակ, ըստ նրա, Ադրբեջանն ապացուցեց, որ նավթադոլարներից բացի` ուրիշ բան չունի և կարող է ցանկացած պահի հարձակվել Հայաստանի վրա:
«Եթե Հայաստանում նման իրավիճակը շարունակվի, այս կենսակերպը շարունակվի, Հայաստանը կարող է ընդհանրապես վերանալ: Հարց է ծագում՝ 5, 10 տարի հետո ՀՀ դեռ գոյություն կունենա՞: Մենք պետք է լուրջ մտածենք՝ ինչ ենք անում»,- ասաց Ա. Գրիգորյանը:
