Հայաստանի Հանրապետությունում է Սլովակիայի գերագույն դատարանի պատվիրակությունը` նախագահ Շտեֆան Հարաբինի գլխավորությամբ:
Պատվիրակությունը հոկտեմբերի 8-ին հանդիպել է ՀՀ վճռաբեկ դատարանի նախագահ Արման Մկրտումյանին և պալատների նախագահներին:
ՀՀ վճռաբեկ դատարանի նախագահ Արման Մկրտումյանը, ողջունելով հյուրերին, շնորհակալություն է հայտնել Սլովակիայի Հանրապետության գերագույն դատարանի նախագահ Շտեֆան Հարաբինին Սլովակիայի Հանրապետության կողմից Հայոց Ցեղասպանության ընդունման, Սլովակիայի Հանրապետությունում ցեղասպանությունը ժխտելու առթիվ քրեական պատասխանատվություն նախատեսող օրենքի ընդունման, Հայաստանի Հանրապետության և Սլովակիայի Հանրապետության դատական համակարգերի միջև կապերի ամրապնդման և զարգացման գործում ներդրած նշանակալի ավանդի համար:
Հանդիպման ընթացքում քննարկվել են երկու երկրների դատական իշխանության վերաբերյալ հարցեր: ՀՀ վճռաբեկ դատարանի նախագահ Ա.Մկրտումյանը ներկայացրեց Հայաստանի Հանրապետության դատական համակարգի կառուցվածքն ու առանձնահատկությունները:
Շ.Հարաբինը, պատասխան խոսքով շնորհակալություն է հայտնել ջերմ հյուրընկալության համար և կարևորեց դատական համակարգերի միջև սերտ համագործակցությունը և փորձի փոխանակումը:
Սլովակիայի Հանրապետության գերագույն դատարանի նախագահը մասնավորապես նշել է, որ Հայաստանի Հանրապետության Արդարադատության խորհրդի օրենսդրական կարգավորումները շատ ավելի արդյունավետ են, քան Սլովակիայի Հանրապետությունում: Նա մատնանշել է նաև Հայաստանի Հանրապետությունում մասնագիտացված դատարանների և դատավորների առկայությունն ու կարևորությունը, որը Սլովակիայի Հանրապետությունում բացակայում է:
Այնուհետև կողմերը քննարկել են փոխադարձ հետաքրքրություն ներկայացնող մի շարք իրավական խնդիրներ:
Պատվիրակության այցելության ծրագիրը մշակվել է այնպես, որ նրանք հնարավորություն ունենան ծանոթանալու ոչ միայն դատական համակարգի գործունեությանը և շենքային պայմաններին, այցելել բոլոր ատյանի դատարաններ, այլ նաև հնարավորություն և ժամանակ ունենան ծանոթանալու Հայաստանի Հանրապետության պատմամշակութային արժեքներին և այցելելու Հայաստանի տեսարժան վայրեր: