Ստեփանակերտի օդանավակայանը կաշխատի՝ միջազգային բոլոր նորմերը պահպանելով: «Առաջին լրատվական»-ի հետ զրույցում հայտարարեց ՀՀԿ փոխնախագահ Գալուստ Սահակյանը՝ մեկնաբանելով Ադրբեջանի փոխարտգործնախարար Արազ Ազիմովի հայտարարությունը, թե «ներկա պայմաններում անհնար է Ստեփանակերտի օդանավակայանի օգտագործումը, ադրբեջանական կողմը երբեք չի ընդունի օկուպացված տարածքներում ենթակառուցվածքների փոփոխությունը, ադրբեջանական օդային տիրույթի ապօրինի օգտագործումը, Հայաստանը խախտում է միջազգային իրավունքը»:
«Կարծում եմ, նրանց մտածելակերպը վրիժառությունն է»,- ասաց Գ. Սահակյանը:
Հարցին՝ ադրբեջանական կողմը սպառնալիքներ է հնչեցրել, որ առաջին իսկ օդանավը խփելու են, ինչպե՞ս կարող ենք ապահովագրվել դրանից, Գ. Սահակյանը պատասխանեց, որ տարիներ շարունակ բացի սպառնալիքից, որևէ նորմալ խոսք չենք լսել ադրբեջանցիներից. «Կարծում եմ, այդտեղ մտահոգվելու բան չունենք, որովհետև օդանավակայանի ամբողջական փաստաթղթավորումը համաձայնեցված է միջազգային կազմակերպությունների հետ: Նույնիսկ եթե նման ոտնձգություն անեն, դա միջազգային նորմերի խախտում կլինի, առավել ևս Ադրբեջանն այսօր այն վիճակում չի, որ կարողանա այնպիսի գործողություններ կատարել, որոնց հետևանքը կդառնա պատերազմական»:
Հարցին՝ Սերժ Սարգսյանը հայտարարել էր, որ Ստեփանակերտ-Երևան օդանավի առաջին ուղևորն ինքն է լինելու, դա դեռ ուժի մե՞ջ է, կթռչի՞ Սերժ Սարգսյանը, Գ. Սահակյանը պատասխանեց. «Ես պիտի ձեզ վստահեցնեմ, որ անկախ նրանից, թե ինչպիսի տրամաբանություն կլինի, մենք չենք կարծում, որ որևէ ինտրիգներ կկարողանա այդ առումով ադրբեջանական կողմը նախաձեռնել: Ես չգիտեմ՝ Սերժ Սարգսյանը կթռչի, թե ոչ, բայց վստահաբար կարող եմ ասել, որ բոլորս էլ պատրաստ ենք թռչելու»:
