Մեծ Բրիտանիայի տնտեսության վերականգնումը կախված է եվրոգոտում տիրող վիճակից,- փոխանցում է Reuters գործակալությունը` հղում անելով Անգլիայի բանկի ղեկավար Մերվին Քինգին: Նրա խոսքերով` վերադարձը մինչճգնաժամային ցուցանիշներին տևական ժամանակ կպահանջի:
«Կարծում եմ, որ հաջորդ եռամսյակը, հավանաբար, կավարտվի տնտեսության աճով: Ենթադրում եմ, որ վերականգնման նշաններ կտեսնենք, սակայն այդ վերականգնումը չափազանց դանդաղ կլինի: Լայնամասշտաբ բանկային ճգնաժամից հետո կասկածում եմ, որ մենք կկարողանանք արագ վերադառնալ բարենպաստ իրավիճակի: Մտավախություն ունեմ, որ դա երկար ժամանակ կպահանջի»,- ասել է Քինգը:
Նա նաև հավելել է, որ իրավիճակը Մեծ Բրիտանիայում նախկինի պես մեծամասամբ կախված է Եվրոպայում տեղի ունեցող իրադարձություններից: «Բրիտանական տնտեսության վերակագնումը կախված է այն բանից, թե ինչ է տեղի ունենում եվրոգոտում և մնացյալ աշխարհում։ ԱՄՆ-ում որոշակի խնդիրներ կան, իսկ Չինաստանն ու Բրազիլիան դանդաղում են: Ապագայում մեր տնտեսության աճի տեմպերը կսահմանի համաշխահային իրավիճակը»,- ասել է Քինգը:
Փորձագետները ենթադրում են, որ Անգլիայի բանկը 2012-ի նոյեմբերին հավանության կարժանացնի 50 մլրդ ֆունտի չափով ֆոնդային շուկայում լրացուցիչ ինտերվենցիաները: Այդպիսով` ԿԲ-ի կողմից տնտեսության մեջ ընդհանուր ներհոսքը կկազմի 425 մլրդ ֆունտ: