Իտալիայի ազգային հավաքականի գլխավոր մարզիչ Չեզարե Պրանդելին հույս ունի, որ իր թիմին դուրս կբերի Աշխարհի առաջնության եզրափակիչ փուլ: Նշենք, որ այն անցկացվելու է 2014 թվականի ամռանը Բրազիլիայում:
Այսօր աշխարհի քառակի չեմպիոնները Աշխարհի առաջնության ընտրական փուլի առաջին հանդիպումը կանցկացնեն Բուլղարիայի ընտրանու դեմ: Այդ խաղը կայանալու է մրցակցի հարկի տակ:
«Դա իրական արկած կլինի: Մտադիր ենք հաղթել բոլոր խաղերում՝ սկսած այս հանդիպումից: Այժմ եկել է ժամանակը Եվրո-2012-ից Բրազիլիա անցում կատարելու համար: Սակայն ես հանգիստ եմ. իմ թիմում կան բավականաչափ փորձառու ֆուտբոլիստներ: Ես շատ խանդավառված եմ, քանի որ թիմում բոլորը Աշխարհի առաջնության եզրափակիչ փուլ դուրս գալու ցանկությամբ են լեցուն»,- Rai Sport-ի փոխանցմամբ՝ ասել է Պրանդելին:
Հատկանշական է, որ Բուլղարիայից բացի՝ իտալացիների մրցակիցներն են նաև Դանիայի, Հայաստանի, Մալթայի ու Չեխիայի հավաքականները:
