«Երեկ ՆԱՏՕ-ի գլխավոր քարտուղարը Երևանում ձևակերպեց իրենց դիրքորոշումը` ՆԱՏՕ-ն և Հունգարիան արել են իրենց անելիքը` դատել են իրենց տարածքում մարդասպանություն կատարած հանցագործին: Արտահանձնումն էլ տեղի է ունեցել եվրոպական կոնվենցիաներին համապատասխան: Ստացվում է, որ ՆԱՏՕ-ն և Հունգարիան որևէ պատասխանատվություն չեն ուզում ` կրել այն բանի համար, որ հայերն ու թուրք-ադրբեջանցիները դարերով իրար հետ շունուկատու են, և հայերի ջիգրու էլ Ալիևն ազատություն է շնորհել ցմահ բանտարկյալին»,- գրում է «Հրապարակ»-ը խմբագրականում և հավելում.
«ՆԱՏՕ-ի, Արևմուտքի, ինչպես նաև Ռուսաստանի` հարցի ընկալումը հետևյալն է. Ալիևը լավ չի արել, բայց հիմա արել է, ի՞նչ կարող ես անել: Մի տեսակ անզորի կեցվածք: Այ, սրա դեմ է, որ մենք պետք է պայքարենք: Մենք պիտի կարողանանք ողջ աշխարհին հասկացնել, որ Ալիևի արարքն աններելի է, հարյուր անգամ ավելի աններելի, քան Սաֆարովի կատարած հանցագործությունը: Բոլորը պիտի հասկանան, որ վաղը, Ալիևի հետ շունուկատու դառնալու պարագայում, Ադրբեջանում կարող է հերոսացվել ամերիկացի, ռուս, ֆրանսիացի կամ գերմանացի մարդասպանը: Եվ այս հեռանկարն է, որ մեզ խանգարելու է շարունակել բանակցություններն Ալիևի հետ: Ալիևն այլևս իրավունք չունի մասնակցելու մի հարցի քննարկման, որտեղ հայի ճակատագիր է վճռվում, ճիշտ այնպես, ինչպես Հիտլերին մոտ չէին թողնի հրեաների Հոլոքոստին վերաբերող քննարկումներին և, լավագույն դեպքում, կհարցաքննեին որպես մեղադրյալի:
Մենք դեմ չենք հարցի խաղաղ կարգավորմանը, մենք կողմ ենք բանակցություններին, բայց մենք հանցագործների հետ չենք բանակցում: Սա պետք է լինի բանակցությունները շարունակելու մեր մեկնակետը: Բանակցային ողջ գործընթացում պետք է հստակ տարանջատել նախասաֆարովյան և հետսաֆարովյան շրջանները»:
