Սեպտեմբերի 9-ին ՀՀ մի շարք համայնքներում տեղի կունենան ՏԻՄ ընտրություններ: Ամենաուշագրավներից է, թերևս, Գյումրիի քաղաքապետի ընտրությունը: «Հայկական ժամանակ»-ը գրում է, որ այստեղ կրքերը բորբոքվեցին հատկապես Սերժ Սարգսյանի հայտարարությունից հետո: Սարգսյանի հայտարարությունը, թե ինքն է անձամբ առաջարկել ԲՀԿ-ական Սամվել Բալասանյանին` առաջադրվել որպես քաղաքապետի թեկնածու, Գյումրիում այնքան էլ միանշանակ չի ընդունվել: Կարծիքներ կան, որ իր հայտարարությամբ Սերժ Սարգսյանն ընդամենը փորձել է մոբիլիզացնել Գյումրիի իշխանական ուժերը, որպեսզի նրանք «խաղեր չտան» Բալասանյանի դեմ:
«Եթե նա գալիս ու հայտարարում է այդ ամենը, ուրեմն` ինչ-որ բան էն չի, իրենց ծրագրավորածից դուրս է…»,- «ՀԺ»-ի թղթակցի հետ զրույցում ասել է Գյումրիի քաղաքապետի թեկնածու, ՀՅԴ անդամ Հովսեփ Սիմոնյանը: Վերջինս համարվում է Բալասանյանի ամենավտանգավոր մրցակիցն այս ընտրություններում: Նշենք, որ Գյումրիում որպես քաղաքապետի թեկնածուներ առաջադրվել են ևս եկուսը` անկուսակցականներ Անդրանիկ Ավետիսյանը և Սպարտակ Պետրոսյանը: Այսօր կեսգիշերից սկսած քարոզչությունը և հակաքարոզչությունն արգելվոմ է և հայտարարվում է «լռության օր»: