Իսպանական «Վալենսիա»-ի ու Արգենտինայի հավաքականի ֆուտբոլիստ Էվեր Բանեգան հայտնվեց տհաճ պատմության կենտրոնում։ Reuters-ը տեղեկացնում է, որ խաղացողը ցանկանում էր գնալ ակումբի մարզաբազա, երբ հանկարծ սկսեց այրվել իր՝ 250.000 դոլար արժողությամբ Ferrari-ն։
Ֆուտբոլիստն անմիջապես զանգահարեց ոստիկանություն և հրշեջ ծառայություն, սակայն ավտոմեքենան արդեն այրվել էր։
Հիշեցնենք, որ 2012 թվականի փետրվարին Բանեգան հայտնվել էր ևս մեկ զարմանալի պատմության կենտրոնում։ Նա իջել էր սեփական ավտոմեքենայից՝ մոռանալով մինչև վերջ արգելակել այն, որից հետո մեքենան շարժվել էր դեպի ֆուտբոլիստը, և վերջինիս ոտքը հայտնվել էր անվադողի և մայթի միջև։ Արդյունքում Բանեգան ոտքի կրկնակի կոտրվածք էր ստացել։
