Թբիլիսիում իր աշխատանքն է սկսել «Այսօրվա Ռուսաստանը` արդիականացման պլանները-ազդեցությունը տարածաշրջանի վրա» թեմայով կոնֆերանսը: Դրան մասնակցում են փորձագետներ Ռուսաստանից, Հայաստանից, Ադրբեջանից, ԱՄՆ-ից, Գերմանիայից, Թուրքիայից, Էստոնիայից: Նրանցից շատերը ներկայացնում են ԱՄՆ պետքարտուղարությունը, Կարնեգի կենտրոնը, ՌԴ նախագահին առընթեր հասարակական խորհուրդը:
Կոնֆերանսում քննարկվելու են Ռուսաստանում ընթացող ներքին գործընթացները և դրանց հավանական ազդեցությունը կովկասյան տարածաշրջանի և հատկապես Վրաստանի վրա:
Ubr.ua կայքը տեղեկացնում է, որ փորձագետների մի զգալի մասը գտնում է, որ Ռուսաստանը պետք է փոխի իր քաղաքականությունը ոչ միայն հարևան երկրների այլ նաև եվրոպական երկրների հանդեպ:
ՌԴ նախագահին առընթեր հանրային խորհրդի անդամ Դմիտրի Օրեշկինը հոռետեսորեն է մոտեցել Ռուսաստանի մոդեռնիզացման գործընթացին, «Այն ինչ կատարվում է Ռուսաստանում, հիշեցնում է Խորհրդային Միությունում տեղի ունեցող գործընթացները: Քաղաքական գործիչների իրական շահերը կապ չունեն մոդեռնիզացման հետ», ասել է Օրեշկինը:
Փորձագետը չի բացառել Ռուսաստանի` որպես միասնական պետության կազմալուծումը, խորհրդային Միության օրինակով: Մասնավորապես, Օրեշկինը գտնում է, որ հաճախ խոսվում է Հյուսիսային Կովկասի հանրապետությունների մասին, սակայն պետք է ուշադրություն դարձնել նաև հեռավորարևելյան և Կալինինգրադի մարզերին, որոնց բնակչությունը Մոսկցայից որևէ դրական ազդանշան չի ստանում: