Իրանական IRIB պետական ռադիոյի թուրքական ծառայության փոխանցմամբ՝ Թուրքիայի նախագահ Աբդուլլահ Գյուլը կոչ է արել վերսկսել Իրանի և նրա միջուկային ծրագրի հարցում միջազգային միջնորդ հանդսիացող «Վեցյակի» միջև բանակցությունները.
«Իրանի միջուկային ծրագրի հարցի լուծումը չափազանց կարևոր է ինչպես տարածաշրջանի անվտանգության ապահովման համար, այնպես էլ գլոբալ մասշտաբով։ Անհրաժեշտ է վերսկսել Իրանի և Արևմուտքի միջև բանակցությունները, որոնք պետք է անցնեն անկեղծության ու թափանցիկության մթնոլորտում»։
Ըստ Գյուլի՝ Իրանը պատմական ու մշակութային պոտենցիալ ունեցող երկիր է։
Հիշեցնենք, որ Թուրքիային ամենևին էլ անհրաժեշտ չէ «միջուկային» Իրանը: Թուրքիան մոտ կես հազարամյակ է, ինչ տարածաշրջանում և իսլամական աշխարհում գերիշխող դիրք զբաղեցնելու շուրջ կատաղի մրցակցություն է մղում իր խոշորագույն և առավել ուժեղ հարևան Իրանի հետ:
Սակայն գլխավորապես տնտեսական գործոնը (միլիարդավոր դոլարների կորուստը), ինչպես նաև իսլամական աշխարհի հետ իր ջերմ հարաբերությունները չփչացնելը Թուրքիային զսպում է Իրանին ուժային հարված հասցնելու շուրջ ԱՄՆ-ի ու Իսրայելի պլանները ողջունելուց:
1991 թվականին տեղի ունեցած Պարսից ծոցի առաջին պատերազմում Թուրքիայի կրած վնասները կազմեցին 50 միլիարդ ամերիկյան դոլար, իսկ 2003 թվականի Պարսից ծոցի երկրորդ պատերազմում` 80 միլիարդ: ԱՄՆ-ը փոխհատուցեց այդ վնասների միայն մի մասը: Սակայն տնտեսական գործոնում վճռորոշ դերը պատկանում է նավթի ու բնական գազի համաշխարհային գների աճին, ինչից ամենաշատն է վախենում Թուրքիան:
Ուժային հարվածի արդյունքում Իրանը տարածաշրջանում կկորցնի ազդեցիկ դերը, կվերածվի երկրորդական երկրի և տևական ժամանակ չի կարողանա տարածաշրջանում ու իսլամական աշխարհում առաջատար դիրքեր զբաղեցնելու շուրջ մրցակցել Թուրքիայի հետ:
