ՀՀ կրթության, գիտության, մշակույթի և սպորտի նախարարությունը խորը վշտով տեղեկացնում է, որ 73 տարեկանում կյանքից հեռացել է անվանի մտավորական, լուսանկարիչ, Հայաստանի ժուռնալիստների միության անդամ, Սերգեյ Փարաջանովի թանգարանի տնօրեն Զավեն Սարգսյանը:
ՀՀ ԿԳՄՍ նախարարությունը ցավակցում է սիրելի արվեստագետի հարազատներին, ընկերներին, գործընկերներին:
Զավեն Սարգսյանի մահվան կապակցությամբ ՀՀ վարչապետի որոշմամբ կստեղծվի հուղարկավորության կառավարական հանձնաժողով:
Զավեն Սարգսյանը ծնվել է 1947 թվականին, Երևանում: 1972 թվականին ավարտել է Երևանի Պոլիտեխնիկական ինստիտուտը: Սովորելուն զուգահեռ՝ 1969-1972 թվականներին որպես ավագ տեխնիկ աշխատել է Երևանի մաթեմատիկական մեքենաների գիտահետազոտական ինստիտուտում: Մինչև 1974 թվականը եղել է Աբովյանի «Սիրիուս» գործարանի ավագ ինժեներ, 1974-1986 թվականներին՝ ՀԽՍՀ նախարարների խորհրդի գործերի կառավարչության արտաքին կապերի բաժնի ավագ ռեֆերենտ: Հայաստանի ժուռնալիստների միության անդամ է (1984 թ.): 1986 թվականին նշանակվել է Հայաստանի ժողովրդական արվեստի պետական թանգարանի տնօրեն, որտեղ աշխատել է մինչև 1992 թվականը:
Զավեն Սարգսյանը լուսանկարչությամբ զբաղվել է վաղ հասակից: Հռչակավոր կինոռեժիսոր, նկարիչ Սերգեյ Փարաջանովի հետ ծանոթությունից հետո, Զավեն Սարգսյանը դարձել է նրա անձնական լուսանկարիչն ու կենսագիրը: 1991 թվականին Զավեն Սարգսյանի անմիջական ջանքերով Երևանում հիմնադրվել է Սերգեյ Փարաջանովի թանգարանը, որն էլ 1992 թվականից նա ղեկավարում էր առ այսօր:
Լուսանկարչական ավելի քան 30-ամյա գործունեության ընթացքում Զավեն Սարգսյանը վավերագրել է հազարավոր անձանց և բնապատկերներ: Սակայն նա առաջին հերթին հայտնի է որպես պատմական, մշակութային և ճարտարապետական կոթողների հրաշալի լուսանկարների հեղինակ, այդ թվում՝ Արևմտյան Հայաստանի տարածքում գտնվող հուշարձանների:
Զավեն Սարգսյանն անհատական ցուցահանդեսներով հանդես է եկել Հայաստանում, ԱՄՆ-ում, Ֆրանսիայում, Գերմանիայում, Չինաստանում, Ռուսաստանում, Վրաստանում, Սերբիայում և այլ երկրներում:
2011 թվականին պարգևատրվել է ՀՀ վարչապետի հուշամեդալով:
Զավեն Սարգսյանն ընդմիշտ կմնա մշակութային հանրության հիշողության մեջ որպես հրաշալի մտավորական, թանգարանային գործիչ, իսկ նրա թողած լուսանկարչական ժառանգությունը դեռ երկար կծառայի սերունդներին իրենց հայրենաճանաչության գործում:
