Ռուս-թուրքական համագործակցության խորացումը չի ազդում և չի ազդի Նիկոսիայի հետ Մոսկվայի երկխոսության վրա: Այդ մասին հայտարարել է ՌԴ արտաքին գործերի նախարար Սերգեյ Լավրովը:
«Թուրքիայի հետ մեր հարաբերությունների հարցում Կիպրոսի մեր բարեկամներին կցանկանայի հավաստիացնել, որ ռուս-թուրքական համագործակցության խորացումը, տարածաշրջանային հարցերի ուղղությամբ Անկարայի հետ փոխգործակցության անհրաժեշտությունը ոչ մի ձևով չի ազդում և չի ազդի Նիկոսիայի հետ մեր երկխոսության վրա»,-ասել է նախարարը «Ֆիլելեֆտերոս» հունա-կիպրական թերթին տված հարցազրույցում:
Ըստ ռուսական կողմի գնահատման՝ «տարածաշրջանում հետագա ապակայունացման իրավիճակ թույլ չտալու քաղաքական կամքն առկա Է ե՛ւ Նիկոսիայում, ե՛ւ Անկարայում»:
«Բացի այդ, կա համընդհանուր հարթակ վիճելի հարցերն արդյունավետորեն լուծելու համար՝ Միավորված ազգերի կազմակերպությունը: Պատրաստ ենք աջակցել բարիդրացիության հաստատմանը Կիպրոսի Հանրապետության և Թուրքիայի Հանրապետության միջև, բայց, անշուշտ, միայն այն դեպքում, եթե մեզ այդ մասին շահագրգիռ ձևով խնդրեն երկու կողմերը»,-հավելել է Լավրովը:
Նա նաև նշել է, որ այսօր ռուս-կիպրական քաղաքական երկխոսությունը «կրում է բարեկամական և վստահալից բնույթ»: Ավելի վաղ հաղորդվել Էր, որ ՌԴ ԱԳ նախարարության ղեկավարը սեպտեմբերի 8-ին աշխատանքային այցով կմեկնի Կիպրոս. ուղևորությունը նվիրված է երկկողմ դիվանագիտական հարաբերությունների հաստատման 60-ամյակին:
