Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Լևոն Ավետիսյանի նախագահությամբ այսօր կայացավ Հայկ Գրիգորյանի և Անի Ներսիսյանի գործով դատական նիստը:
Ըստ մեղադրանքի՝ 25-ամյա Անի Ներսիսյանի դրդմամբ 27-ամյա Հայկ Գրիգորյանը 2013 թվականի փետրվարի 20-ի երեկոյան մի խումբ անձանց հետ նախնական համաձայնությամբ, որպես զենք օգտագործված առարկայի գործադրմամբ, առողջության համար վտանգավոր բռնությամբ բացահայտ առևանգել է Վ.-ին, նրա կամքին հակառակ տեղափոխել Արարատի մարզի Բարձրաշեն գյուղում գտնվող քարի արտադրամաս, որտեղ ծեծի են ենթարկել տուժողին:
Հայկ Գրիգորյանը մեղադրվում է նաև տուժող Վ.-ից առանձնապես խոշոր չափի գույքի շորթման համար:
Հայկ Գրիգորյանը կալանքի տակ է, իսկ Անի Ներսիսյանի նկատմամբ կիրառվել է այլընտրանքային խափանման միջոց՝ գրավ:
Այսօր գործով դատական քննության առաջին հարցաքննությունը կատարվեց: Հարցաքննվեց տուժող Վ.-ն:
Այս երիտասարդը, որ ամուսնացած է, ընտանիք, երեխա ունի, մտերիմ հարաբերությունների մեջ է եղել ամբաստանյալ Անի Ներսիսյանի ընկերուհի Լ.-ի հետ, ով իր հերթին նույնպես ամուսին ու ընտանիք ուներ:
2012 թվականի սեպտեմբերին Վ.-ն ինչ-ինչ հարցերով տարաձայնություններ է ունեցել մտերմուհու հետ և, իր ասելով, խզել է իրենց կապը:
Բաժանումը «կոնֆլիկտային է եղել», ինչպես այսօր ասաց տուժողը: Երկուստեք շարունակել են պարզաբանումներ կատարել: Ըստ տուժողի՝ իր մտերմուհու ընկերուհի Անին, հնարավոր է՝ որոշ դեր խաղացել էր իրենց հարաբերությունների խզման հարցում:
2013 թվականի փետրվարի 7-ին ընկերուհիները Վ.-ին հրավիրել են «Ուրարտու» ռեստորան՝ Անիի ծննդյան օրը նշելու: Վ.-ն գնացել է, սակայն ռեստորանում ոչ թե տոնական տրամադրություն, այլ բուռն վիճաբանություն է եղել, կրքերը ավելի են շիկացել:
Տուժողը հստակ չասաց, բայց մեղադրողների հարցերին պատասխանեց, թե Անին իրեն զանգահարել ու հասկացրել է, որ ինքը շրջապատ ունի, ազդեցիկ մարդիկ, ովքեր կարող են Վ.-ին հասկացնել այն, ինչ չի հասկանում:
Բայց փետրվարի 20-ին Անին զանգահարել ու այլ կերպ է խոսել Վ.-ի հետ: Նա ասել է, թե ընկերուհու ամուսինը տանը չէ, իրենք երիտասարդին հրավիրում են Լ.-ի ամուսնու տուն, որ հանգիստ, տնային պայմաններում նստեն ու խոսեն, միգուցե նաև՝ հաշտվեն:
Վ.-ն համաձայնել է: Ու ընկել է թակարդը:
Ժամը 20-ի սահմաններում նա հասել է Լ.-ի շենքի մոտ: Անին նրան ուղղորդել է, թե որտեղ կանգնեցնի մեքենան: Դա շենքի կողքի հատվածն է եղել, փակուղի:
Վ.-ն, դեռ ոչինչ չկասկածելով, կանգնեցրել է մեքենան, իջել, մոտեցել Լ.-ի շքամուտքին: Այդ ընթացքում զանգել է Անիին, բայց Անին այլևս չի պատասխանել:
Դրա փոխարեն շքամուտքի մոտ Վ.-ն տեսել է հաղթանդամ մի տղամարդու, ով «զննողական» նայել է նրան:
Վ.-ն վատ բան է կանխազգացել, ցանկացել է հետ դառնալ, մոտենալ մեքենային, բայց հաղթանդամը մոտեցել, ներկայացել է որպես ոստիկանության աշխատակից, ասել է, որ Վ.-ին պետք է բերման ենթարկեն: «Ոստիկանը» չի պատասխանել Վ.-ի հարցին, այլ ուժգին հարվածել է նրա դեմքին:
Վ.-ն ընկել է, վեր կացել, նորից հարված ստացել ու նորից ընկել: Երբ բարձրացել է, մի ծանր հարված էլ թիկունքից է ստացել, իր կարծիքով՝ ինչ-որ առարկայով կատարված հարված: Ուշաթափվել է:
Շենքի մոտ գտնվող մարդկանց այդ ծեծողները հայտարարել են, թե իրենք ոստիկանությունից են, ԱԱԾ-ից են, օպերատիվ գործ են անում:
Վ.-ն ասաց, թե չի հիշում՝ ինչ մեքենա են իրեն նստեցրել, ինչպես են նստեցրել: Ինքը պարբերաբար կորցրել է գիտակցությունը:
Չի հիշում, թե ինչպես են տարել, ուր են տարել, ինչպես են իջեցրել մեքենայից: Ուշքի է եկել ինչ-որ շինությունում, բետոնե սառը հատակին:
Նա հստակ հիշում է, որ ամբաստանյալ Հայկը, ով ներկայացել է որպես «Կոլո», այդ շինությունում ասել է, թե ինքը Լ.-ի ու Անիի պատիվն է պահում: Վ.-ն փորձել է նրան հասկացնել, թե այդ ում պատիվն է պահում, միգուցե լավ չի ճանաչում այդ աղջիկներին: Բայց Հայկը իրեն ուժեղ ծեծի է ենթարկել, պահանջել, որ նա հեռու մնա Լ.-ից ու Անիից:
Ի վերջո, Վ.-ն խոստացել է հեռու մնալ, այլևս նրանց չանհանգստացնել:
Հետո, ըստ տուժողի այսօրվա ցուցմունքի, Հայկը ասպարեզում չի երևացել: Նրա հետինները՝ «բոյովը», «կարճահասակը», «բրենդային» հագնվածը, «կոֆե բերողը» շարունակել են ծեծել ու գույք պահանջել՝ վախեցնելով, թե կվնասեն Վ.-ին, նրա կնոջն ու երեխային: Նրանք ասել են, թե որտեղ է սովորում երեխան, որտեղ է աշխատում կինը, ինչ ունեցվածք ունի Վ.-ն՝ այսինքն, ցույց են տվել, որ լավատեղյակ են, որ նա ունևոր է, ու ստեղծված իրավիճակը հարթելու համար պարտավորեցրել են, որ իրենց տա բնակարանը, մեքենան, օբյեկտը և մեծ գումար:
Ըստ տուժողի՝ իր մեքենայից գտել էին մեքենայի յուղով լցված ներարկիչ, որով աները յուղում է «Մերսեդեսի» որոշ դետալներ: Առևանգողները գոռգոռացել են, թե ներարկիչի մեջ «չեռնյաշկա» է, որ Վ.-ն նարկոման է, հանցագործ, նրան ծանր հոդվածներ են սպասվում, եթե պահանջված գումարները չտա:
Տուժողն ասաց, թե իր առևանգման սկզբում ինքը հավատացել է, որ այդ մարդիկ ոստիկաններ են: Նրանք շատ համոզիչ են գոռգոռացել, հոդվածներ են թվարկել, իրավաբանական տերմիններ օգտագործել, իրենց պահել են այնպես, ինչպես լինում է հանցագործ բռնելու ժամանակ:
Հետո, արդեն լքված արտադրամասի նման տարածքում, երբ Հայկը պահանջել է, որ աղջիկներին այլևս չմոտենա, տուժողը հասկացել է, որ այդ գործում խառն են աղջիկների, իսկ ավելի կոնկրետ՝ Անիի մատները:
Տուժողը հայտնեց, որ արտադրամասում, բետոնե հատակին ընկած, ինքը տեսել է աղջիկների «կաբլուկներ», հետո իրեն ասել են, որ Լ.-ն ու Անին նույնպես եղել են արտադրամասում: Ինքը հիշում է միայն նրանց ճտքակոշիկները:
Քիչ հեռու դրված սեղանին տեսել է իր իրերը՝ հեռախոսները, օդամղիչ ատրճանակը, որն անսարք էր, այփադը, դրամապանակը՝ մոտ հազար դոլարով:
Իրենից պահանջել են, որ տուն զանգի ու տնեցիներին ասի՝ փող հասցնեն: Բայց Վ.-ն համոզել է, որ իրենց տանը այդպիսի հարմար մարդ չկա, որ ինքը համաձայն է՝ ունեցվածքը տալ, միայն թե այլևս բռնությունների չենթարկվի, ընտանիքին էլ չվնասեն:
Հաջորդ օրը նա լույսի շող է տեսել, հասկացել, որ լույսը բացվել է: Բայց նրան բաց են թողել միայն երեկոյան՝ մոտ 20-ի սահմաններում, այնպես որ՝ 24 ժամ պահել են արտադրամասում:
Երեկոյան նորից Վ.-ի աչքին երևացել է Հայկը: Նա զգուշացրել է, որ Վ.-ի իրերը դնեն հետը, նոր բաց թողնեն: Բայց նրանք, ովքեր շորթողներն էին, այդ իրերը չեն տվել, դեռ վերցրել են նաև Վ.-ի պարանոցի շղթան ու խաչը: Շղթայի մի կտորն ու խաչը հետագայում վերադարձրել են:
Վ.-ին մեքենայով, երկար, քարքարոտ ճանապարհով հասցրել են քաղաք, այդ մեքենայում է եղել նաև Հայկը:
Վ.-ին բաց են թողել պայմանով, որ նա կկատարի իրենց պահանջները ու կտրամադրի իր գույքը:
Վ.-ն տուն է հասել, անմիջապես մտել ցնցուղի տակ, բայց հենց բաղնիքում էլ ուշաթափվել է: Նրան հասցրել են հիվանդանոց:
Հետագայում Վ.-ն փորձությունների է ենթարկվել նաև նախաքննական մարմնի կողմից, նրա նկատմամբ երկու անգամ գործ է հարուցվել, ստուգվել է՝ նա թմրամոլ կամ խաղամոլ չէ՞ արդյոք, այլ հանցանքներ չի՞ գործել: Երբ առողջական վիճակը վատացել է, ու նա ցանկացել է մեկնել Հայաստանից՝ բուժման նպատակով, օդանավակայանում բռնել ու վերադարձրել են. «Ոնց որ իսկական հանցագործ լինեի»,- ասաց տուժողն ու ընդգծեց, թե շատ դառնացած է նախաքննության ընթացքից:
Մեղադրողներ Աղայանն ու Սաղաթելյանն էլ «դառնացած էին», որ տուժողն իր ցուցմունքներում համառորեն շեշտադրում էր, թե Հայկն իրենից շորթում չի կատարել, շորթել են մյուսները՝ Հայկի անտեղյակության պայմաններում:
Երկու մեղադրողները մոտ երեք ժամ խաչաձև հարցաքննեցին տուժողին:
Ամբաստանյալ Հայկ Գրիգորյանին շորթման համար առաջադրված մեղադրանքը միգուցե հաստատվել է տուժողի նախաքննական ցուցմունքներով, բայց նախաքննական ցուցմունքները դեռևս չեն հրապարակվել, նախաքննական ու դատաքննական ցուցմունքներում առկա հակասությունների պարզաբանմանը դատարանը դեռ չի հասել:
Տուժողն ընդունեց, որ Անի Ներսիսյանը կալանավայրից զանգահարել է իրեն, ասել, թե ինքը չի ցանկացել, որ նման բան լինի, փորձել է մեղքն ուրիշի վրա գցել:
Տուժողն ասաց նաև, թե նախաքննության ընթացքում ինչ-որ փակ համարից զանգել են իրեն ու վախեցնելու համար ասել. «Նախաքննական մարմինը մերն ա, ինչ ուզենք՝ կանենք»: Տուժողը կասկածում է, որ այդ սպառնալիքն ի կատար են ածել՝ իր նկատմամբ գործ հարուցելով:
Տուժողը նշեց նաև, որ իր հետ այնպես են վարվել, որ ինքը լրիվ իրական է համարել իր ընտանիքի վերաբերյալ հնչեցված սպառնալիքները ու պատրաստ է եղել ամեն բան տալ, միայն թե ընտանիքին բան չպատահի:
«Ես էդ բետոնե հատակին ընկած՝ սպասում էի, որ իմ ճակատագիրը կվերջանա, բայց հաջորդ օրվա ավարտին զգացի, որ բաց կթողնեն»:
Նրան ամբողջ ընթացքում հաց չեն տվել, բազմիցս ծեծի են ենթարկել, խմիչքն էլ լցրել են գլխին, որ երեք վերքերից առատորեն հոսող արյունը կանգնեցնեն: Մինչև անգամ առևանգողների միջից պաշտոնյայի տեսք ունեցողը, տեսնելով Վ.-ին, հանդիմանել է իր հանցակիցներին. «Էս ի՞նչ եք արել»:
Ըստ տուժողի՝ իր ունեցվածքի մասին առևանգողներին երևի տեղեկացրել էր նա, ով կազմակերպել էր իր առևանգումը: Հնարավոր է, որ առևանգումից առաջ իրեն հետևել են, իմացել, թե կոնկրետ ինչով է զբաղվում:
Տուժողի նախկին մտերմուհի Լ.-ն այս գործով վկայի կարգավիճակ ունի:
Հաջորդ դատական նիստին կշարունակվի տուժողի հարցաքննությունը:
