Հետընտրական տարեվերջյան օրերն են, բնականոն զարգացումներ են ընթանո՞ւմ, թե՞ կան շեղումներ «Առաջին լրատվական»-ի հարցին «Լուսավոր Հայաստան» կուսակցության կողմից ընտրված ԱԺ պատգամավոր Գևորգ Գորգիսյանը պատասխանեց․ «Ես մոտավորապես այսպես եմ ձևակերպում՝ մեր մոտ հետընտրական շրջանը չավարտված, սկսեց նախատոնականը։ Ըստ այդմ, ամեն ինչ նաև մի քիչ սովորականից դուրս է գնում, բայց մենք ամեն դեպքում սպասում ենք եկող տարվա սկզբին կայանալիք Ազգային ժողովի առաջին նիստին»։
Դատելով Երևանի ավագանու նիստերից, «Լուսավոր Հայաստան» կուսակցությունը քաղաքական սթափության ողջ ծանրությունը վերցրել է իր վրա։ «Առաջին լրատվական»-ի հարցին՝ դեռևս չձևավորված խորհրդարանում ինչո՞ւ եք նման դեր ստանձնել, Գևորգ Գորգիսյանը պատասխանեց․ «Իսկ եթե ոչ մենք, ապա ո՞վ։ Մենք գիտակցում ենք, որ քաղաքացիներն իրենց ձայնը տվել են հենց դրա համար, որպեսզի մենք լինենք այդ հակակշիռը, այդ սթափության կոչ անող ու սթափություն պահպանող ուժը, և մենք պատրաստ ենք այդ խաչը կրել։ Մինչ այսօր չունենք և չկան նաև խոսակցություններ, որ բացի մեզնից, կլինեն նաև այլ ուժեր։ Մենք սովոր չենք ուրիշների վրա հույս դնել, ինքներս մեր վրա ենք մեր հույսը դնում և այդ կերպ շարունակելու ենք։ Եթե ուրիշները բեռի մի մասը կկրեն իրենց վրա, միայն ուրախ կլինենք ու կողջունենք»։
«Ճիշտն ասած՝ ես չեմ հասկանում, թե ինչ է նշանակում արմատական ընդդիմություն։ Եթե դա կոնկրետ խմբի մարդկանց շահերը պաշտպանող խումբ է կամ զինված ինչ-որ խումբ է, ապա այո, մենք այդպիսին չենք»,- հավելեց ԱԺ պատգամավորը։
Ամբողջությամբ՝ տեսանյութում։
