Տավուշի մարզի Բերդ-Իջևան ավտոճանապարհի Պառավաքարի հատվածում հոկտեմբերի 22-ին տեղի ունեցած միջադեպը, երբ հակառակորդի կրակոցներից հայկական կողմը երեք վիրավոր և մեկ զոհ է գրանցել, Ադրբեջանի կողմից ապակայունացման հերթական փորձն էր: Հոկտեմբերի 28-ին ԱԺ նախասրահում կայացած ճեպազրույցում նման տեսակետ հայտնեց Հայաստանի Հանրապետության պաշտպանության նախարար Սեյրան Օհանյանը:
«Ընդհանուր առմամբ՝ վերջին տարիների վերլուծությունը ցույց է տալիս, որ առաջին գծում ՀՀ սահմաններում և ԼՂՀ-ի շփման գծում խախտումները տեղի են ունենում քաղաքական իրադարձությունների, հանդիպումների, կառավարման ոլորտում փոփոխությունների շրջանակներում: Այս լարվածությունը համընկել է Ադրբեջանի ներքին անցուդարձին, դա ձեռնտու է հակառակորդին, և կարծում եմ, որ այն առաջարկությունները, որ մենք կատարում ենք մեր կողմից վստահության եզրեր գտնելու, երկխոսության գնալու ու առաջնային գծում լարվածության իջեցման, դիպուկահարների հետքաշման, դիվերսիոն հետախուզական գործողությունների կանխարգելման և զերծ մնալու համար, Ադրբեջանի Հանրապետության ԶՈւ կողմից չեն ընդունվում ու հերքվում են»,- ասաց նա:
Օհանյանը նշեց, որ հակառակորդն այս իրավիճակում նորից փորձել է ապակայունացնել իրավիճակը: Հարցին՝ արդյոք դա Սաֆար Աբիևի փոխարինման հետ կապ ունի՞, նախարարը պատասխանեց, որ ամեն ինչի հետ էլ կարող է կապ ունենալ: «Ես գտնում եմ, որ մեր քաղաքականությունը պետք է մեկը լինի. մեր հրամանատարները տեղում սթափ կերպով սառնասրտորեն գնահատում են յուրաքանչուր իրավիճակի փոփոխություն և համապատասխան կանխարգելման ու պատժելու միջոցառումներ են ձեռնարկում: Այս դեպքի հետ կապված՝ մեր հրամանատարները խիստ կերպով պատասխանել են, և մենք շարունակելու ենք խիստ կերպով պատասխանելու մեր քաղաքականությունը»,- ասաց նա՝ նշելով, որ ինքն անձամբ կիրակի օրը եղել է տեղում, ուսումնասիրել է և՛ մեր դիրքի իրավիճակը, և՛ իրադրությունը, և՛ ճանապարհային ցանցը:
Նախարարը համոզմունք հայտնեց, որ մեր հրամանատարները համապատասխան միջոցառումներ կձեռնարկեն, որ իրավիճակն ավելի հանդարտվի:
Լուսանկարը՝ PanARMENIAN Photo-ի
