Առաջին իսկ օրը, երբ հրապարակվեց Հայաստան-ԵՄ համաձայնագիրը, մենք մեր ընկերների հետ ծանոթացանք և քննարկում կազմակերպեցինք՝ հասկանալու համար, թե որ դրույթներն են պահպանվել Ասոցացման համաձայնագրից հետո։ Այդ մասին «Առաջին լրատվական»-ի հետ զրույցում նշել է «Ելք» խմբակցության պատգամավոր Մանե Թանդիլյանը։
Նրա խոսքերով՝ փաստորեն այս համաձայնագիրը Ասոցացման համաձայնագրի կրճատված տարբերակն է և կրճատված հիմնականում այն մասով, որը Հայաստանին տնտեսական առավելություններ կընձեռեր. «Այս առումով փաստաթուղթը շատ թերի է այնքանով, որ չի արտացոլում շահերի այն ամբողջ փաթեթը, որը կցանկանայինք այնտեղ տեսնել։ Միաժամանակ, այս համաձայնագիրը ստեղծում է պլատֆորմ, որը տրված է Հայաստանին բարեփոխումներ իրականացնելու մարդու իրավունքների, ժողովրդավարության, դատական ինստիտուտների ստեղծման ոլորտներում։ Այսինքն՝ սա մի հնարավորություն է, որը Հայաստանը ստացել է ԵՄ-ից, եթե ցանկություն ունի բարեփոխումների ճանապարհով գնալ։ Ես համարում եմ, որ այս փաստաթուղթը կարող է աշխատել միայն մի դեպքում, եթե իշխանությունները ցանկանան այն կյանքի կոչել։ Այսինքն՝ այստեղ չկա պարտավորություն, կա հնարավորություն։ Նման հնարավորությունը չօգտագործելը լրիվ ապաշնորհություն կլիներ»,- ընդգծեց նա։