Բրիթնի Սփիրսն իր նոր ալբոմը կկոչի Britney Jean: Այս մասին հայտնում է Digital Spy-ը՝ հղում անելով Capital Radio-ին երգչուհու տված հարցազրույցին:
Բրիթնի Ջինը կատարողի ամբողջական անունն է: Սփիրսի խոսքով՝ հենց այդպես են նրան դիմում հարազատները, և նա դա գնահատում է որպես քնքշության դրսևորում: Երգչուհին ցանկացել է այդ զգացողությամբ կիսվել երկրպագուների հետ: Բացի այդ, նրա նոր ալբոմը շատ անձնական է ստացվել, այդ իսկ պատճառով դրան նման անվանում է տրվել:
Britney Jean-ը կդառնա Սփիրսի 8-րդ ալբոմը: Work Bitch երգը, որը դարձել է ալբոմի առաջին սինգլը, Սփիրսը թողարկել էր սեպտեմբերի 15-ին: Հոկտեմբերի սկզբին էլ հայտնվել է երգի տեսահոլովակը:
Ձայնասկավառակը վաճառքի դուրս կբերվի դեկտեմբերի սկզբին: Նախորդ ալբոմը՝ Femme Fatale-ը, նա թողարկել էր 2011-ին:
Նշենք, որ երգչուհու երրորդ սկավառակը, որը թողարկվել է 2001-ին, կրկին կրել է նրա անունը՝ Britney:
