Ամիսներ շարունակ Կարեն Կարապետյանի շրջապատը թմբկահարում էր, թե կառավարությանը հաջողվել է կոտրել ԴԱՀԿ նախկին պետ, ներկայումս պատգամավոր Միհրան Պողոսյանի բանանային մենաշնորհը: Այդ մասին անցած տարեվերջին հեռուստալրագրողների հետ հանդիպման ժամանակ հպարտ տոնով հայտարարեց Կարեն Կարապետյանը, հետո` ՊԵԿ-ը խրոխտ հայտարարություն տարածեց, թե ինչպես է պայքարում անհայտ մարդկանց դեմ, ովքեր իբրև թե խոչընդոտել են բանանի ներկրմանը: Գուցե մենք սխալ ենք հասկանում, բայց հակամենաշնորհային պայքարը չի ավարտվում միայն նրանով, որ ցանկացած մարդ կարողանա ինչ-որ բան ներկրել: Կառավարության հիմնական ֆունկցիան է նաև իրական մրցակցային միջավայր ստեղծել երկրի ներսում:
Գործարար Վահրամ Միրաքյանն այսօր հայտարարել է, որ անցած գիշեր 200 քառակուսի մետր տարածքում պահվող բանանի սառնարանների կոմպրեսորների վրա քիմիական թթու են լցրել: Պարզ է, որ տեղի ունեցածը շարքային գողություն կամ հանցագործություն չէ. ոչ թե բանան են գողացել, այլ մտածված խափանել են այն սառնարանների աշխատանքը, որոնցում պահվում է բանանը: Վահրամ Միրաքյանն ասում է, թե ոմանց հաստատ դուր չի գալիս, որ իրենք բանան են ներկրում` կատարվածի սլաքն ակնհայտորեն ուղղելով բանանի ներկրման մոնոպոլիստ Միհրան Պողոսյանի շրջապատի ուղղությամբ: Գուցե գործարարի վարկածը միանգամայն իրական է, մանավանդ, որ մեր քրեաօլիգարխիան առավոտից երեկո չի երդվում հումանիտար արժեքներով: Սակայն Միրաքյանը, առաջին հերթին, վարչապետ Կարեն Կարապետյանի զոհն է, որ հավատացել է նրա հակամենաշնորհային խոստումներին և հիմա մնացել է անպաշտպան երկրի իրական տերերի սանձարձակության դեմ: Գուցե Կարեն Կարապետյանն էլ է զոհ և ցանկացել է պայքարել մենաշնորհների դեմ, սակայն պարտվել է քրեաօլիգարխիայի դեմ պայքարում: Եթե այս վարկածը նույնիսկ ճիշտ է, ապա Կարեն Կարապետյանը պետք է հեռանա վարչապետի պաշտոնից, մանավանդ, երբ շուտով այն դառնալու է երկրի թիվ մեկ պաշտոնը, որովհետև Հայաստանին նման թույլ և անզոր ղեկավար պետք չէ:
Եթե Սերժ Սարգսյանը քրեաօլիգարխիայի «կնքահայրն» է և, ըստ անհրաժեշտության, կարողանում է սանձել առանձին օլիգարխների, ապա Կարապետյանը վերջիններիս առաջ լրիվ կապիտուլացվել է: Սակայն ավելի հավանական է, որ կեղծ, շինծու է եղել Կարապետյանի հակամենաշնորհային կամպանիան: Դա եղել է PR խորհրդարանական ընտրություններից առաջ, որն այլևս ժամանակավրեպ է: «ՀայՌուսգազարդի» նախկին տնօրեն Կարեն Կարապետյանը հայկական օլիգարխիայի, կոռուպցիոն գործարքների խորհրդանիշներից մեկն է, ու սա լավ գիտեն նաև մարդիկ, ովքեր փորձում են «չար» Սերժ Սարգսյանին փոխարինել «բարի» Կարեն Կարապետյանով: Այդ «բարությունն» արդեն դրսևորվել է Կարապետյանի մտերիմների բիզնեսներին տրվող արտոնություններով, թերևս եկել է ռուսահայ կրիմինալ «էլիտայով» Հայաստանի քրեաօլիգարխիան ուժեղացնելու ժամանակը:
