Ըստ ամենայնի, Շվեյցարիային չի հաջողվել վերակենդանացնել հայ-թուրքական գործընթացը, ինչի մասին վկայում է երեկ Բեռնում Սերժ Սարգսյանի հնչեցրած գնահատականը: Սարգսյանը մասնավորապես հայտարարել է, որ Թուրքիան շարունակում է Հայաստանի և սփյուռքի միջև սեպ խրելու անհեռանկար գործընթացը: «Եվ որքան շարունակվեն այդ ջանքերը, այնքան նվազելու է կարգավորման գործընթացի նկատմամբ մեր վստահության` առանց այդ էլ նվազագույնի հասած պաշարը», հայտարարել է Սարգսյանը:
Մի քանի օր առաջ էլ Հայաստանին սահմանամերձ շրջաններում իրականացնելով խորհրդարանական քարոզարշավ` Թուրքիայի վարչապետ Էրդողանն էր հայտարարել, որ հայ-թուրքական հարցում Թուրքիայի նախապայմանները մնում են նույնը և ուժի մեջ. մինչև չկարգավորվի Ղարաբաղի խնդիրը այնպես, ինչպես Ադրբեջանը կուզի, Թուրքիան հարաբերություն չի հաստատի Հայաստանի հետ: Սերժ Սարգսյանի շվեյցարական հայտարարությունը կարելի է համարել պատասխան Էրդողանին, ինչից արձանագրվում է, որ թե՛ Թուրքիան, թե՛ Հայաստանը շարունակում են մնալ իրենց դիրքերում և չեն նահանջում հետ: Դա նշանակում է, որ առաջիկայում հայ-թուրքական կարգավորման գործընթացը չի մղվի օրակարգային առաջին պլան:
Ըստ ամենայնի, Հայաստանի իշխանության համար դա այնքան էլ ցանկալի նորություն չէ, և այն, որ Սերժ Սարգսյանը թե՛ Երևանում ընդունեց Շվեյցարիայի նախագահին` մարտի վերջին, թե՛ անմիջապես ընդունեց նրա պատասխան հրավերն ու մեկ ամիս անց մեկնեց Շվեյցարիա, վկայում է, որ Սերժ Սարգսյանը պատրաստակամ էր հայ-թուրքական գործընթացին վերադառնալու հարցում: Դա ինքնին հասկանալի է, որովհետև ինչքան էլ ներքաղաքական կյանքում Սերժ Սարգսյանը կարծես թե ներդաշնակության է հասել ընդդիմության հետ հարաբերություններում և կարողացել է որոշակի հավասարակշռություն ապահովել իր համար, այդուամենայնիվ նա, թերևս, շատ լավ է պատկերացնում, որ իշխանության ներկայիս սնանկության պատճառով այդ հավասարակշռությունը չի կարող երկար շարունակվել, և վաղ թե ուշ իշխանությունը կանգնելու է «անկեղծության պահի» և վճռական որոշումների կայացման անհրաժեշտության առաջ:
Իսկ դա իշխանության համար խիստ անցանկալի հեռանկար է, որից խուսափելուն կարող է օգնել հայ-թուրքական գործընթացի վերակենդանացումը` կրկին շեղելով հասարակությանը և ստվերելով ներքաղաքական օրակարգը: Հետևաբար, եթե հայ-թուրքական գործընթացի հարցում Շվեյցարիային չի հաջողվել որևէ տեղաշարժ արձանագրել, կնշանակի, որ Սերժ Սարգսյանին չի հաջողվել այդ գործընթացի միջոցով իր համար ներքաղաքական գործընթացից նահանջի ճանապարհ ապահովել, համենայնդեպս` առայժմ:
